Shillong, Jymmang 5: Ka Meghalaya kala pynkut ia ka jingiakhun jong ka Group A ha ka lympung Swami Vivekananda U-20 Men’s National Football Championship 2025 da ka jingjop ba 7 la 0 pyrshah ia ka Bihar ha Narainpur, Chhattisgarh, kaba long hynne ka sngi Nyngkong.
Ka Meghalaya kala ioh rung lypa sha ka quarterfinals hadien ka jingjop kaba ar ha ka jingialehkai pyrshah ia ka Kerala, ar sngi shwa hynrei kila ioh ban jop lai sien kynthih kaba la pynbiang pura ia ka kynhun bad ki rangialehkai ka Meghalaya kila dep ban pynrem ruh ia ka Rajasthan ha ka sngi sdang kata ha ka 29 tarik u Iaiong.
Na ka liang u Coach u Bah Bobby L Nongbet u la bujli tang u wei ha ka jingialehkai bad ka Kerala mynta ka sngi Nyngkong da kaba wanrah ia u Franky Dkhar ha ka jaka jong u Banlamkupar Rynjah haba sdang jong ka jingialehkai.
U Ricky Kharkongor (4’), u RT Hanson Pdang (9’), u Riborlang L Lyngkhoi (13’) bad u Franky (17’) ki la pynthikna ba ka jingialehkai kan long kaba biang bha bad ki la thep goal tang hapoh 20 minit jong ka jingiakhun ha kaba ka Meghalaya ka la lamkhmat da 4-0 kol ha ka double quick time.
U Ricky u la ioh ka lad ban pynkhih ia ka jar ba nyngkong eh, katba u Hanson u la thep ia ka goal kaba ar lyngba ka free-kick, u Riborlang u la thep ia ka goal kaba lai bad lyngba ka jingbakla jong u nongap goal, u Franky u la thep ia kawei da ka kjat kadiang jong u.
Ka jingialehkai kala shu kut noh da 4 la 0 haba kut ka kylla step bad hadien bas dang ka kylla miet ka Meghalaya kala wan phai biang ha ka jingthep goal ha kaba ka por 48 minit u Riborlang u la ioh ban thep iaka goal nabar jong ka box, u Rimankhraw Kharumnuid u la thep ia ka goal lyngba ka penalty (78) bad u
Pyrkhatshaphrang Sumer u la ioh ban thep goal biang ha ka minit ba (90’+3).
Ka Meghalaya kan ïakhun pyrshah ïa ka Karnataka kaba wan hakhmat duh ha ka Group B ha ka quarterfinal round kaban long ha ka 9 tarik u Jymmang, ka Karnataka ka dang don ka jingïalehkai ban ïakhun ha ka sngi Ba-ar thohdieng hynrei ka la dep ban buh jaka lypa ne rung ha ka knockout round.
