Shillong, Risaw 25 : Ka Sorkar Jylla kala tyrwa ban pynbna ia artylli ki jaka ha East Khasi Hills kum ki “Protection Site” ne ki jaka bala iada kyrpang kat kum ka Meghalaya Heritage Act, 2012.
Kane ka long kat kum ka jingpynbna kaba la mih na u Commissioner & Secretary ka Tnad Arts & Culture Bah FR Kharkongor.
Kat kum kane ka jingpynbna, kine ki artylli ki jaka ki dei ka Archaeological site ha Myrkhan kaba hapoh ka Mylliem Block bad ka Megalith Monument (ki mawbynna) ha Rynghep, Nongkseh.
La ong ba lada don kino kino kiba pyrshah, ki dei ban pynpoi ia ka jingujor pyrshah sha ka Sorkar hapoh ka 30 sngi naduh ba pynmih ia kane ka jingpynbna lem kumta yn ym pdiang satia.
