Nongpoh, Risaw 24: Ha kawei ka jingjia aksiden kali, 3 ngut ki heprit ki la mynsaw hadien ba kawei ka kali rit ka bym lah ban tip satia ka dei kaei, ka la lymbub syndet ia ki katba ki dang iaid kjat harud ka surok bah NH-6 hajan ka shnong Pahamrioh, Ri Bhoi District.
Katkum ka jingtip, ba la iohlum, la iathuh ba kane ka jingjia ka la jia ha ka por 11 baje eiei nohphai sngi, katba kine ki heprit ki dang iaid lynti narud ka surok bah NH 6.
Kine ki heprit kiba la mynsaw ki kynthup ia u Treiborlang Suting (12) bad u Shanborlang Suting (11) kiba dei ki shipara Trai bad u wei pat la tip kyrteng kum u Budlang Ryndong (11) kiba shong basah ha ka shnong Pahamrioh Them.
La ioh jingtip ruh, ba ki riew paidbah kiba iohi ia kane ka jingjia ki la mareh bran bran sha katei ka jaka ban ai jingiarap ia kine ki heprit bad ban pynkit noh marmar sha Nongpoh Civil Hospital na ka bynta ki jing sumar kiba kyrkieh.
Na ka liang ki pulit ka Nongpoh Police Station ki dang pynlong ia ka jingtohkit halor kane ka jingjia bad ruh ban thwet ia ka kali kaba la lymbub ia kine ki heprit kaba la phet krad noh na katei ka jaka.
