Tyrwa ka Sorkar ban pyndait kor CCTV ha Mawlai Pyllun | Yn pyntreikam noh ia ka MRSSA

Tyrwa ia ka skhim shna parking lot ha ki jaka shimet ha Mawlai

Shillong, Jylliew 24 : Ka Sorkar Jylla kala tyrwa ban pyndait kor Close Circuit Television (CCTV) bad ki solar street light ha manla ki Shnong ka Mawlai Pyllun bad ban pyntreikam noh ruh ia ka Meghalaya Residents Safety & Security Act (MRSSA) ban lah wanrah ia ka jingshngain kaba kham paka ia ki nongshongshnong ka thain.

Kane ka jingtyrwa kala mih ha ka jingialang jong ka Zonal Task Force, Mawlai Sector, kaba long ha ka 20 tarik Jylliew ha ka Conference Hall jong ka Ophis u Project Director, District Rural Development Agency, East Khasi Hills-kaba la wan iashimbynta da ki nongialam Shnong ka Mawlai bad kiwei kiwei.

Ia kane ka jingialang la pyniaid da u Bah R Wahlang, MCS, uba dei u Chairman ka Zonal Task Force ka Mawlai Sector.

Ha kane ka jingialang, la kyrpad ia ki Shnong ka Mawlai ba kin phah ia ki jingtyrwa halor ka jingpyndait kor CCTV bad ki solar street light ban ioh mang pisa bad ban pyntreikam ia ki. La kyrpad ruh ban buh ia ki CCTV Control Room ha manla ki Ophis jong ki Dorbar Shnong bad ban buh ia ki briew kiba la hikai pyntbit ki ban pyndonkam ia ki kor peit pyrman ia ka shnong ka thaw.

Ka jingialang kala iakren ruh halor ka jingpyntreikam ia ka Meghalaya Residents Safety & Security Act (MRRSA) haba pyntip ba ka Sorkar kala sdang pyntreikam ia kane ka Ain ha manla ki shnong ban pynthikna ia ka jingshngain jong ki nongshongshnong.

Hapoh ka MRRSA, baroh ki nongshongwai kin hap ban pynrung kyrteng bad pynshisha da ki Dorbar Shnong bad ia ki data baroh yn sat hep ha ka Centralised Dashboard System, ka ban iarap ia ki bor Sorkar ban ithuh bad peitngor ia ki nongshong shnong ba shu wan sah shipor.

Ka jingialang kala pynleit jingmut eh ha ka jingiakren halor ki kam pyniaid Sor kum ka jingteh kyndon ha ki kam kali, ki jingtei ia ki jaka pynieng kali bad ka jingpyntreikam ia ki skhim ka Sorkar ha ki shnong ki thaw.

Kane ka jingialang kala iakren ruh halor ka prokram ba thymmai ka Sorkar ban bei pisa sha ki riewshimet ba don jaka ba kin shna ia ki jaka pynieng kali. Ha kane ka skhim, ka Sorkar kan synniang T.1 lak ia shi unit ka jaka pynieng kali bad ia ka pisa ba ioh lum, 75% kan leit sha ki trai jaka bad 25% kan shim ka Sorkar.

Kane ka sienjam la khmih lynti ba kan pynbun bha ia ka jingdon ki jaka pynieng kali haba pynthikna ia ka jingiatreilang hapdeng ka Sorkar bad ki riew shimet.

U Chairman ula pyntip ruh ba ka Ophis jong ka Deputy Commissioner kan sa pynmih shen ia ka jingpynbna paidbah-kaba iadei bad ka jiingithuh ia ki jaka pynieng kali bad ki jaka bym shah pynieng kali ha manla ki shnong ki thaw, ka ban sdang treikam naduh ka 1 tarik Naitung 2025.

Kine ki jaka ba shah ban pynieng kali bad ki bym shah pynieng kali kin dei kiba ithuh kat kum ka jingai jingmut jong ki Zonal Task Force.

U Chairman ula pan ruh ia ka jingai jingmut na ki dkhot halor ka jingdonkam ban aipor ia ki Shnong ki Thaw ba kin ithuh bad ai jingtip ia ki jingtyrwa jong ki haba iadei bad ki jaka pynieng kali hashuwa ban pynmih ia ka jingpynbna.

Da ka jingia mynjur lang baroh ban aipor shuwa ia ki shnong ki thaw ba kin iasyllok, la kyntu ia ki Rangbah Shnong ba kin ia pynbeit bad ki Assistant Urban Planner bad aiti ia ka thup jong ki jaka ba kila ithuh kum ki jaka ba shah pynieng kali bad ki bym shah pynieng kali hashuwa ka 30 tarik Jylliew, 2025.

U Urban Planner ula ai ka jingbatai halor ka jingtyrwa halor ka dor bai pynieng kali bad pyntip ba ka dor kan iapher na kito kiba pynieng kali harud surok bad kiba pynieng sharud shakiar, ia kaba yn oh dor man ka kynta ba ki pynieng.