Shillong Jymmang 31: Ka Committee ki seng sain pyrthei kaba iatai halor ka Roster bad Reservation Policy, kala rai ban phah iaka jingtyrwa sha ka Sorkar jylla ba kan thaw ia ka Expert Committee ne ka committee ki stad ki jhad na ka bynta ban pynbeit thymmai iaka Reservation Policy.
Ia kane la pyntip da ka Chairman jong ka Committee ka Kong Ampareen Lyngdoh haba iakren bad ki nongthoh khubor hadien bala wai ka jingialang jong ka Committee hynne ka sngi Balang, kaba la wan ban iashimbynta da ki seng sain pyrthei bapher ka jylla kiba kynthup naka seng NPP, UDP, HSPDP, BJP, Congress, AITC, VPP, GNC bad KHNAM.
“Ka jingthaw ia ka Expert Committee kan dei kawei na ki jingtrywa ban sa phah sha ka Sorkar Jylla da ka Committee” kala ong haba pyntip ba kane ka Committee ki stad ki jhad kan don ia ki briew ba tip ain, kiba tip ia ka Riti Synshar ka Ri bad ki briew n aka Tnad Economics ki ban khmih ia ki jingkhein bad samari halor ka jingdon paid.
Ka Kong Ampareen kala dei ruh ka Myntri ka Tnad Ain, kala ong ba ym baroh ki seng sain pyrthei kiba la mynjur ban don ia ka Expert Committee.
“Ki don ki seng sain pyrthei kiba mynjur bad ki don ruh ki seng sain pyrthei ki bym mynjur. Mynta ngin leh iala ka jong ka kam da kaba phah ia ki jingiakren baroh hapoh ka jingialang sha ka Sorkar Jylla” kala bynrap.
Haba kylli, ka Chairperson kala ong “Kumba ngi ong ba baroh ngi mynjur ba donkam ban don ia ka Committee ba kyrpang, ka Committee kaba don ia ki riewtip Riti Synshar, Economics, Survey and Statistics bad ruh kiba shemphang bha halor ka Ain hynrei ngin dang hap ban tyrwa ia kane sha ka Sorkar Jylla”.
Ka Kong Ampareen kala ong ba ki seng sain pyrthei bapher bapher ki don iala ki jong ki jingpynsngew halor ka kam ba iadei bad ka Job Reservation Policy.
“Don kiba kwah ban neh kumjuh, don kiba kwah ban bishar thymmai..hynrei kine ki mat baroh ki dei kiba la shu iakren. Mynta, ngim lah ban shu iakren hakhmat jong ka Committee bad khmih lynti ba ka Committee kan sngewthuh lut ia kaei kaba phi mut” kala ong haba bynrap “Kaba ar ka long ba phi lah ban wanrah da ka menu ba kdew ba ngi kwah ia kane, kwah ia katai, hynrei ia kane ruh phi hap ban pynksan khnang ba kiwei ki seng sain pyrthei ruh kin ioh pyni iala ki nia bad ba ngin nang lah ban iakren biang”.
Haba kyntu ia baroh ki seng sain pyrthei ban ai ia ki jingai jingmut da ka jingthoh halor kane ka kam hapoh ka 15 sngi, ka kong Ampareen kala ong “Ngi la kyrpad ia baroh ki seng sain pyrthei ba kin pynkhreh ia ki jingai jingmut, ban weng ia ki kyndon, ki jingmait ia ki kyntien naka Policy kiba shong ain bad ngi lah ban ai jingmut kat kaba ngi kwah hynrei ngi dei ban pynthikna ba ngi sngewthuh ia ki kyndon ain ba kan nym don jingktah ia ka Sorkar hadien habud”.
“Namar kata, ngin sa buh jingthoh lut ia baroh ki jingiakren bad ngin sa phah ia ki sha ka Sorkar. Hynrei katba ka Committee kam pat ioh ia ki jingai jingmut da ka jingthoh kiba shong ain na ki seng sain pyrthei, ka Committee ka lah ban iakynduh bad iakren ia kano kano ka kam” kala pynpaw.
Nalor kane, ka Kong Ampareen kala niew ia kane ka jingiakren halor ka Reservation Policy ka long kaba thnem bha bad ong ba katto katne ki seng sain pyrthei ki sngew ba ngi dei ban pyniaid beit shakhamt ia ka jingthungkam shisien ba la dep ban pynshai ia ka Roster sha kito ki seng sain pyrthei ki bym shym la wan iashimbynta ha ka jingialang ba nyngkong jong ka Committee hynrei ki don ruh kiba ong ban pynsangeh shuwa.
Ka Chairperson ka pyntip ruh ba ki artylli ki seng sain pyrthei-ka VPP bad KHNAM, ki bym shym la wan sha ka jingialang ba nyngkong jong ka Committee bad ki bym don jingtip ia ki jingiakren halor ka Roster System, kin sa iakynduh biang bad ki Ophisar ban pynhun ia ki jingsngewthuh jong ki halor ka Roster System.
Ka Committee kala tyrwa ban sa shong jingialang biang hadien ka lai taiew.
