Shillong, Jymmang 18 : Ka seng Federation of Khasi Jaintia & Garo People (FKJGP) Sengkmie kala mih ban kyntu ia ki seng sain pyrthei ka Jylla ba kim dei ban shah ia ka Sorkar Jylla ba kan pyntreikam ia ka Roster System da kaba kyrtiang dien sha ki 50 snem bala leit noh haba pynsngew ruh ba dei ban pynbiang tarajur noh ia ka jingaibhah ha ka State Reservation Policy kat kum ka jingdon paid.
Kane ka jingpynpaw ka FKJGP kala mih shisngi shuwa ba ki seng sain pyrthei kin leit iashimbynta ha ka jingialang bala khot da ka Sorkar Meghalaya Democratic Alliance(MDA)-2, ban iatai halor ka jingpyntreikam ia ka Roster System jong ka Job Reservation Policy ka Jylla, ka ban long lashai ka 19 tarik Jymmang.
“Kum ka Sengbhalang bala shakri mynta la palat 33 snem, ngi dap da ka jingbynniaw ban iohi ia ka jingpyrshang jong ka Sorkar ban kyrtiang dien naduh u snem 1972 haba pyntreikam ia ka Roster System, kaba mih na ka jingbthah jong ka Iingkashari Meghalaya High Court” ong u Samla Kitboklang Nongphlang, Vice President ka FKJGP.
Kat kum ka jingong jong u, ka FKJGP ka kyntu ia baroh ki seng sain pyrthei ka Jylla ba kim dei shuh ban kyrtiang dien ia ki 50 snem bala leit noh hynrei ban saindur thymmai ia ki snem ki ban sa wan lada ki don shisha ia ka jingkitkhlieh bad ka jingiohi jngai.
“Ngi kyntu ruh ia kiban leit iashimbynta ba kin shim ia ka jingkitkhlieh ba ka tarajur haka jingai bhah, kam dei satia ban noh shiliang” ula ong haba bynrap “ Ka FKJGP ka dawa na ka Sorkar MDA ban pynbeit thymmai noh ia ka State Reservation Policy ba ka jingai bhah kan long kat kum ka jingbun paid (population ratio)”.
Une u Nongialam ka FKJGP ula ong ba ka Sorkar ka dei ban pyntreikam ia ka Roster System shakhmat naduh ba pynmih ia ka hukum lane kat kum ka jingbthah jong ka Iingkashari Meghalaya High Court ym ban phai dien trai.
