Shillong, Lber 20: U Co‑Chairman jong ka Meghalaya State Planning Board Bah John F Kharshiing ula leit iakynduh ia u Myntri ka Sorkar Pdeng ba khmih ia ka DoNER Jyotiraditya Scindia ha ka sngi Thohdieng ban pynpaw ïa ka jingdonkam ban don ka jingkyrshan kaba neh ha ka rukom treikam bad ka jingbei tyngka ia ki Nongialehkai bad ia ki synjuk ïalehkai jong ki jylla kynthup ka 4th NE Games ha Arunachal Pradesh, Indoor Hall ha man ki C&RD Block bad ka CSR fund.
U Bah Kharshiing uba long ruh u Secretary General ka North East Sports Association bad Working President ka Meghalaya State Olympic Association ula ong, ba palat 3500 ngut ki nongialehkai bad 500 ngut ki nongpyniaid na ki 8 tylli ki jylla jong ka thain shatei lammihngi kin iashimbynta ha ka jingiakob ialehkai kaba la tyrwa bad ong ba kane kadei ka rynsan kaba kongsan ban kyntiew ia ka kam ialehkai ha ka thain, ban saindur ia ka sap ka phong jong ki khynnah bad samla bad ban tei ia ka mynsiem iakhun ha ki kyrdan kiba iahap ha ka ri bad ka pyrthei.
Ula banjur ban tei ïa ki PEB Indoor Multi-Sports Halls (70m x 50m x 8.5m) ha kylleng ki Block ha ki wat ki bapher bapher, 55 tylli ha Meghalaya bad 686 tylli ha kiwei pat ki bynta jong ka thain ban plie lad ia ki samla ha ka thain nongkyndong ban ïoh ia ki jaka ïalehkai kiba paka.
Ula kyntu ban bhah tyngka kyrpang ban pyndap pynbiang ia ka bai leit bai wan, jaka sah, ka bam ka dih na ka bynta ki nongialehkai na ka thain shatei lammihngi ka ri kiba iakhun ha ki rynsan iakob ha ka ri, ryngkat bad ka jingpynkhreh jong ka kynhun ia ka 39th National Games kaban long ha Meghalaya.
Ula iathuh, ba u Scindia ula ïaroh ïa kine ki jingtyrwa bad pynthikna ban khmih bniah shisien ba la dep ban phah sha ki Sorkar Jylla bapher bapher.
U Bah Kharshiing ula ong, ba kane ka jingiakren ka long kum ka jingïaid shaphrang ban pynkhlaiñ ïa ka jingïatreilang hapdeng ki kynhun ïalehkai ha ka thaiñ Shatei Lammihngi.
