Shillong, Nailar 08: Ka Hynñiewtrep Youth Council (HYC) kala dawa na ka Meghalaya Public Service Commission (MPSC) ba kan jied ïa ki kyrtong iohkam katkum ka jingioh heh Marks ka jongki ha ka ‘Typing Speed Test’ na ka bynta ka kam Typist ha ki Tnad bapher bapher.
Ha ka shithi sha u chairman ka MPSC, u President ka HYC bah Roykupar Synrem ula ong ba kat kum ka ‘jingpynbna laitkam’ ha ka 14 tarik u Nohprah 2020, ka MPSC kala khot ia ki aplikeshon ban pyndap ia ki 18 tylli ki kam Typist kiba lait ha ki Tnad bapher bapher.
Halor kane, ka MPSC kala pynlong ia ka Screening Test ha ka 15 tarik u Iaiong 2023 bad ïa ka Typing Speed Test la leh ha u bnai Jylliew- Naitung 2024 hynrei ïa ka result jong kiba pass, haduh mynta ka Commission kam pat pynbna.
Hynrei la poi ha ka jingtip jong ngi, ba ka Commission haba pynbna ia ka thup jong ki briew kiba pass na ka bynta ka kam Typist (ordinary grade) ha ki ophis jong ki Tnad bapher bapher (Iaiong, 2016), kala iaid lait na ki rukom leh mynshwa ha ka jingai jingmut ia ki kyrteng jong kito ki kyrtong kiba ioh bun tam ha ka Speed Test bad ym shim la pynshong nongrim ha ki Marks jong baroh ar, ka Screening Test bad Typing Speed Test.
“Kane ka long pyrshah ïa ki kyndon kumba la buh ha ka Rule 19 (iii) jong ka Meghalaya Directorate Establishment (Ministerial) Service Rules, 2010 ha ka Schedule-III kaba ai na ka bynta ki Typist, ka kyrdan kaba donkam ka long “matrik/HSSLC examination lane kano kano ka kyrdan pule kaba ïaryngkat bad ban pass ïa ka Test ha ka English Type Writing ba la pynlong da ka MPSC”,” ong u Bah Synrem da kaba bynrap, ba kumba long ha ka jingpynbna jong u bnai Nohprah 2020 la kdew ha ka Para-8 (Ka rukom jied) ba ka jingjied/jingai jingmut ba khatduh ïa ki kyrtong kiba biang ha ki kam ba lait yn leh da ka Commission lyngba ka jingstet ha kaban Type ha kaba iadei bad ka jingthungkam ha ka kam Typist.
“Ngi kyntu ïa ka Commission ba kan jied/ai jingmut tang ïa ki kyrteng jong kito kiba ïoh ïa ki Marks kiba heh tam ha ka Typing Speed Test bad ban nym shim ïa baroh ar ki Marks jong ka Screening Test bad Typing Speed Test kum ki Marks kiban shah jied/ai jingmut na ka bynta ki Post jong ki Typist ha ka ophis jong ki khlieh jong ki tnad (Nohprah 2020),” ong u President ka HYC ha ka shithi.
“Ka HYC ka ngeit ruh ba ki jingbym ïahap ha ka rukom jied ki pynduh noh ïa ka nongrim ba la pynshong nongrim ha ka jinglah bad jingtbit bad ka ktah ïa ki kyrtong kiba dei hok kiba don ïa ka jingstet ban Type kaba donkam, na ka bynta ka kam hynrei ki lah pat ban ym shym la lah ban lehbha ha ka Screening Test,” ula bynrap.
 kala dawa na ka Meghalaya Public Service Commission (MPSC) ba kan jied ïa ki kyrtong iohkam katkum ka jingioh heh Marks ka jongki ha ka ‘Typing Speed Test’ na ka bynta ka kam Typist ha ki Tnad bapher bapher.){kind=link}