Bthah ia ki SP ban leh tyngeh ia ki trok ba kit tam
Shillong, Lber 31 : Ka Iingkashari Meghalaya High Court hynne ka sngi Thohdieng, kala tynjuh ia ka Sorkar Jylla halor ka jingbym lah ban tehlakam ia ki kali ba kit palat pud haba bthah ia baroh ki Superintendent of Police ba kin shim ia ka sienjam ban leh eiei pyrshah ia ki trok ba kit palat pud hapoh ka Jylla.
“Ka Jylla kala ong ba ia ka blueprint la dep ban pynkhreh bad ka jingthied ia ki kor electronic weigh-pads kan pynlong ia ka Jylla ban hap pynlut haduh T. 27 lak. Hynrei, haba khein ia ka dor ban shna ia shi kilometer ka surok, ka jinglong jaka lum ha ka Jylla bad ka jingioh slap ba jur jan hynrieew bnai, kam dei ban don ka jingai daw ha kaban kynshew pisa ban tehlakam ia kane ka kam” ong ka Iingkashari Division Bench haka hukum haba bishar ia ka PIL bala mudui da u Tennydard Marak.
Kala bthah ruh ba baroh ki Superintendent of Police jong ki District ki dei ban tih ia kane bad ia ki jingbthah ban tehlakam ia ki trok ba kit palat pud. Shisien ba ka don ka jingtalasi bad la pynsangeh ia ki katto katne ki trok bad ym shah ba kin kit lane khlem da pynhap noh ia ki mar ba kit tam, kiwei ruh ki lah ban shim kabu lang”.
Ka Iingkashari ka ong ba sngewsih, ka sienjam bala shim da ka Jylla ban tehlakam ia ki kali ba kit palat pud ka long ka bym ai jinghun bad la khmih lynti ba kan shim ia ka sienjam ba dei ban shim halor kane. La bthah ia ka Jylla ban aiti ia ka kaiphod hapoh ka 3 tarik u Jymmang.
Kala ong ba wat hapdeng shibun ki kaiphod bala ai da ka Jylla bad ka jingbanjur jong u Nongmudui bala leh khyndiat eh ha kaban tehalakam ia ki kali ba kit palat pud ha kylleng ki surok ha ka Jylla, kam shym la paw satia ban don ka jingpynjanai ia kane ka jinglong jingman.
Ka kaiphod ba kham mynshuwa ka pynpaw ba ki don kumba 16 tylli ki weighbridge kiba treikam ha kylleng ka Jylla bad bah aba kut jong une u bnai, ka jingdon jong ki weighbridge ba treikam kin nang kiew.
Ka Jylla hynne ka sngi ka pyntip ba 19 tylli ki weighbridge kila treikam bad sa saw tylli kin sa treikam noh hapoh ka artaiew eiei.
Ha kajuh ka por, ym lah ban iaid lait ba ha ki katto katne ki jaka jong ka Jylla, khamtam ha ki thain Pynursla, Shella, Dawki bad Nongstoin, ki kali kiba kit mar bad wat kiba kit shyiap kila pyndap smam ia ka mar bad bun ki kila iaid khlem ka jing salia namar ka jingbym don ba tehlakam ia ki.
Ka Iingkashari ka ong ba watla kam don weighbridge, ka long kaba donkam ba kum kine ki kali, don ki bym don numbor plate, kim shym la pynthikna ia u pud kit mar bad ki bor pyniaid.
Ki don ki jaka khamtam ha ki thain Pynursla, ha kaba da ki hajar tylli ki trok la iohi ba ki ia ieng shi jaka, baroh ki dei kiba thmu ban kit maw bad wat u shyiap sha Bangladesh bad ym don kawei ruh kaba bud ia ka kyndon jingthew bala buh ban kit.
