Shillong, Nailar 05: Ka Sur ka Bri U Hynniewtrep hynne ka sngi thohdieng, kala leit tur paidbah sha Secretariat bad dawa ia ka Sorkar Jylla baka dei ban pynbna paidbah noh ia ka jingshem jong ka jingtohkit halor ka jingshah siat iap u Nongialam barim ka HNLC Bah Cheristerfield Thangkhiew.
U Chairperson ka Meghalaya Human Rights Commission (retd) Justice T Vaiphei uba khlieh marwei ia ka jingtohkit, ula aiti ia ka kaiphod sha ka Sorkar Jylla naduh u bnai Jymmang 2022.
Une u Judge barim ula sdang ia ka jingtohkit naduh u bnai Nailur 2021 ia ka jingshah siat iap u Bah Cheristerfield Thangkhiew hala ka jong ka Iingsah kaba jia ha ka 13 tarik Nailar 2021.
Une u Judge ula kylli tohkit ia kane ka jingjia na ki 6 ngut ki Heh Pulit ka Jylla kiba don bynta ha ka jingkhynra ia ka Iingsah u bah Cherist lem bad 4 ngut ki bahaiing hasem bad arngut ki Doktor.
“U Justice Vaiphei ula dep ban aiti ia ka kaiphod naduh u bnai Jymmang 2022 hynrei haduh mynta ka Sorkar ka dang sngap man man bad ym sei paidbah satia ia kaei ka jingshem jong kane ka jingtohkit” ong ki Nongialam ka Sur ka Bri U Hynniewtrep.
“Ki paidbah ki kwah ban tip ia ka jingshisha bad ha kaei ka nongrim ba la shu siat iap ia u Bah Cherist” kila ong.
Kine ki Nongialam ka Sur ka Bri U Hynniewtrep kila shong kyllain mungor hakhmat ka khyrdop jong ka Secretariat ha ryngkat ki placard ba pynrem jur ia ka sorkar Meghalaya Democratic Alliance (MDA).
