Nongstoin, Naitung 22 : Ki Dkhot ka Khasi Students Union (KSU)-West Khasi Hills, kala tur paidbah hynne ka sngi Nyngkong sha ka Nongstoin Police Station namar ka jingshah khot hajir jong ki 2 ngut ki nongialam ka KSU-Nongstoin.
Jan kot spah ngut ki dkhot bad Nongialam ka KSU kila iamih ryntih ban synran ia kineki 2 ngut ki Dkhot ba shah khot hajir.
Kine ki arngut ki dei u President ka KSU Nongstoin Circle samla Wilbest Wanniang bad u General Secretary samla Commingstar Kharsyntiew. Kine ki arngut kila shah khot hajir namar ka jingtalasi ia ki kot ki sla jong ki nongbylla bar jylla kiba trei bylla ha ka karkhana sain nar ha Rwiang bad kiwei kiwei ki jaka.
Haba iakren bad ki nongthoh khubor hadien ba mih na thanad, ki Nongialam kila pyntip ba kane ka jingkhot hajir jong ki Pulit ka dei kaba la leh khlem kano kano ka jingshah ujor ejahar hynrei kila pynshong nongrim halor ki video bala saphriang ha ki rynsan social media.
Kila ong ruh ba kane ka jingkhot hajir ka dei tang ban pyndep ia ka jingbthah jong ki bor kiba halor.
