Guwahati, Naitung 23 : Ka Iingkashari Special Judge, Assam ha ka sngi Nyngkong kala hukum pynsajia ia 33 ngut ki briew kynthup ia u Chairman barim ka Assam Public Service Commission (APSC) Rakesh Paul namar ka rukom thungkam beain ha ka kam Agriculture Development Officer (ADO).
U Special Judge ula pynbna ia ka hukum halor ka case no 5/2021 bala register bad ka Bhangagarh Police Station.
Ka Iingkashari kala shem ia ka jingdonkti ki 33 ngut kiba shah kynnoh haba iadei bad kane ka jyrsieh. Napdeng kine, 4 ngut ki dei ki dkhot ka APSC, uwei u Nongtrei ka APSC bad lai ngut ki middlemen bad 36 ngut ki ADO.
Ki lai ngut ki middlemen ki kyrteng u Vikash Pincha, Kunal Das bad u Kaushik Kalita, kila lait na ka jingpynsajia jong ka iing kashari bad kumjuh ruh u nongtrei ka APSC Syed Musharraf Hussain.
Hynriew ngut kiwei ki Ophisar (kyrtong) ba kyrteng Beauty Gogoi, Phiruj Moran, Jyotiban Dutta, Saijali Johori, Dhritiman Roy, Mousumi Saikia, Boichitra Hakmaosa ruh kila lait na ka jingshah pynsajia.
Nalor u Rakesh Kr Paul, uba la shah pynngat ha ka jingpynsajia ki dei u Basanta kr Doley, Samedur Rahman bad 29 ki kyrtong ba iakhun ia ka eksam.
Ia u Rakesh Paul, Samedur Rahman, bad Basanta kr Doley la pynngat hapoh ka kyndon 420 pule lang bad ka kyndon 120B jong ka IPC, kyndon 468 pule lang bad ka kyndon 120 B, kyndon 7 jong ka PC Act pule lang bad ka kyndon 120 B bad ka kyndon 13(2) jong ka PC Act, 1988 ba pule lang bad ka kyndon 120 IPC.
Ka Iingkashari kala pyndep ia ka jingshong bishar ia kane ka case naduh ka 3 tarik Naitung kaba long pyrshah ia 43 ngut ki briew kiba la shah jer kyrteng ha ka jingthungkam ia ki ADO da ka APSC, ka selection kaba la pynlong ha u snem 2015 bad bala pynbna ia ka result ha u snem 2016.
Kane ka jyrsieh kala mih pyrthei hadien ba uwei u kyrtong ula ujor da ka ejahar ha Bhangagarh Police Station ha u snem 2017.
Une u kyrtong ba kyrteng u Bedanta Bikash Das uba la iakhun ia ka eksam, ula ujor ejahar ba kynnoh ba ula shah dawa pisa haduh T.15 lak ban ioh ia ka kam ADO. U Das ula kynnoh pyrshah ia u Chairman barim ka APSC Rakesh Paul ha ka ejahar.
 jong ka PC Act, 1988 ba pule lang bad ka kyndon 120 IPC.){kind=link}