Nongstoin, Risaw 14 : Ki Nongshongshnong ka thain Ri Muliang, ha ka sngi Ba-ar, kila iatur paidbah sha ka Ophis treikam u Deputy Commissioner ha Nongstoin, ban pynpaw ia ka jingpyrshah kaba jur halor ka jingthmu jong ka Sorkar ban pyn kynriah noh ia ka Ri Muliang C&RD Block kaba don ha ka shnong Nonglang sha ka shnong Tynghor.
Kine ki Nongshongshnong kynthup ki Nongsynshar Shnong ki dei kiba naka shnong Nonglang, Mawkapiah, Kyndongngei, Kyrdum, Umwahlang, Umbyrsit, Mawsikar, Umwali, Umpha bad kiwei kiwei.
Ki Nongialam Shnong ha ryngkat u Secretary ka Hima Nongmynsaw Syiemship Bah HL Tongkhar, haba iakren bad ki nong thoh khubor hadien ba iakynduh ia u Deputy Commissioner, kila pyntip ba naduh ba plie ia ka Ophis ka Block ha Nonglang naduh u snem 2022, baroh ki paidbah kila mynjurlang ba kane ka Ophis kan iai neh beit ha Nonglang.
Kila ong ba ka thain ka kyndit ba mynta ki mih kiwei pat ki kynhun kiba pyrshang ban phah rah noh ia kane ka Ophis na Nonglang sha Tynghor. Kila pynpaw ba da lei lei ruh kin ym shah ban pynkynriah haba dawa ia u Deputy Commissioner ba u dei ban tuklar bad ban pynneh beit ia ka Block ha Nonglang kumba la rai naduh ka sien ba nyngkong.
Kila pyntp ba na ka liang u Deputy Commissioner ula kular ban shimkhia ha kaban pynsngew ia kane ka jingdawa jong ki sha ki bor ba dei peit ia kane ka kam.
