Shillong, Risaw 14: U Myntri ka Tnad Sports and Youth Affairs Bah Wailadmiki Shylla, hynne ka sngi Baar, ula pynbna ban pynlong ia ka Sardar 150 Unity March ha Meghalaya — ka sienjam kaba la shim hapoh ka National Campaign ban kynmaw burom ia ka lyngkhuh sngikha ba 150 snem jong u Sardar Vallabhbhai Patel.
Haba iakren bad ki nongthoh khubor, u Bah Shylla ula ong, “Ngi don hangne mynta ka sngi ban pynsaphriang ba ngi lah shah bthah ha ka Ministry of Youth Affairs and Sports ban pynlong ia ka Unity March kum shi bynta jong ka jingrakhe ia ka lyngkhuh sngikha ba 150 snem jong u Sardar Vallabhbhai Patel. Kane kan long ka jingkynmaw h ka histori ym tang kum ka prokram hynrei ka jingiakhih ban pynkyndit bynriew ia ka mynsiem jong ka ri”
U Bah Shylla ula pyntip ba ia kane ka campaign, la plie ha ka 6 tarik u Risaw da u Myntri ka tnad Ialehkai ka ri u Dr. Mansukh Mandaviya, kaba la iaid shakhmat ha ki wat bapher bapher ha kaba ki samla na kylleng ki bynta jong ka ri kila iashimbynta ha ka jingiakob thoh essay, ki jingiakob ha ki rynsan social media bad Leadership Programmes lyngba ka My Bharat portal.
Ula ong ba ka wat ka ba-ar jong ka campaign kan sdang ha ka 31 tarik u Risaw bad kan bteng haduh ka 25 tarik u Naiwieng ha kaba yn pynlong ia ki Padyatras ha ki district kiba don ha kylleng ka jylla Meghalaya. Ha man la kitei ki jingiaid kan long haduh 8-10 Km ha man la ki district bad Lok Sabha constituency.
“Hashwa ban pynlong ia ki Padyatras ha ka thain, ngin pyniaid shakhmat ia ki jingiakob iatai nia, iakob thoh essay, pynlong ia ki Seminar bad pynlong ia ki Swadeshi Mela ha ki skul bad college” ong u Bah Shylla.
“Kane ka jingiaid kjat kan ym long tang kum ka prokram hynrei kan dei ka jingkyrsiew ia ki paidbah, kumba u Sardar Patel ula pyniatylli ia ki jylla ban thaw ia kawei ka ri India, kane ka Unity March kan pyniatylli ia ki dohnud jong ki paidbah ki jong ngi” ula ong.
U Bah Shylla ula pyntip ba 2 ngut napdeng ki 5 ngut ki Padyatra na ki thain bapher kin iaid da ka kjat sha Karamsad, Gujarat ka jaka kaba la kha ia u Sardar Patel ha u Naiwieng 2025 ban iasnohkti lang bad kiwei pat na kylleng ki bynta jong ka ri India.
Ka jingpynkut kan long ha ka 26 tarik u Naiwieng, kaba dei ka Constitution Day, ha kaba ki nongiashimbynta da ki hajar ngut kin iaid 152 Kilometer na Karamsad sha ka jaka kaba la buh ia u Statue of Unity ha Kevadia.
“Haba ngi kynmaw ia u Sardar Patel mynta, Ngi dei ruh ban kynmaw ba ka jingangnud ka jongu kaba dei na ka bynta ki pateng kiba ndang wan” ong u Bah Shylla.
