Thang ia ka tyngshop ki bor pyniaid hakhmat khyrdop
Shillong, Nailar 08 : Ka Khasi Students’ Union (KSU) ha ka step sngi Palei, kala tur paidbah biang sha ka Ophis Meghalaya Public Service Commission (MPSC) bad dawa ia u Chairman bad ia u Secretary jong ka Commission ba kin hiar shuki noh.
Kane ka dei ka sien kaba ar ba ka KSU kala leit iakhih hakhmat ka MPSC halor ka kynrum kynram kaba mih na ka kam thungkam ia ki Ophisar Meghalaya Civil Services (MCS) bala pynbna result dang shen.
Ka jingiatur hynne ka step ka dei halor ka nongrim ba ka MPSC kala kyntait ban pyntreikam ia ka jingdawa jong ka KSU, kata ban pyllait paidbah ia ki marks bala ioh da baroh ki nongiakhun ia ka eksam MCS, ba kan wanrah ia ka jingshai ha ka rukom thungkam.
U President ka KSU samla Lambokstar Marngar ha ryngkat u General Secretary samla Donald V Thabah, kila ialam ia ka kynhun ban iakhih ha phyllaw jong ka MPSC ryngkat ka jingpyrta slogan “MPSC Chairman, MPSC Secretary stepdown” ne “MPSC Chairman, MPSC Secretary hiar shuki noh”.
Ki Dkhot ka KSU kila rah ruh ia ki banner kiba don ia ki jingthoh “Ka Iing wanrah kam-MPSC | Ka jingthep kam tuh-MPSC”, “Shaniah ia ka MPSC, lah kumba shaniah ia ka Iing skum”.
Nalor kine, kala don ruh ka banner kaba kynthoh tyngeh kiba ong “Ko Nongpyniaid MPSC, to kylla to pynbeit, ioh lap la sngi, phin sa sylla, phin sa kyrbeit” bad “MPSC Nongtuh, MPSC riewkai”.
Ka KSU dang shen kala kynnoh ba ka MPSC kala kyntait ban pyllait paidbah ia ki marks jong ki nongiakhun eksam tang namar ka jingpyrshah ki 6 ngut ki kyrtong ba kynthup ia ka Khun jong u Secretary ka Commission.
Ka KSU kala khot bad wer ruh ia ki 13000 ngut ki nongiakhun ia ka eksam MPSC ba kin iasnohkti lang bad ka KSU ban pyn duh jait syndon ia ki kam leh bym hok bad kam bamsap ha ka thungkam thungjam hapoh ka MPSC.
Ki Dkhot ka KSU kila thang ruh ia ka tyngshop ki bor pyniaid ka MPSC ha khyrdop jong ka Commission ha ryngkat ka jingpyrta slogan “Ka hok jong ngi wat ju leh kai-Wat ju leh kai-Wat ju lehkai” bad “MPSC down down”.
Haba iakren bad ki nongthoh khubor, u samla Lambokstar ula kynnoh ba ki jingaidaw ka MPSC ki dei tang ka jing pyrshang ban buhrieh ia kaei re kaei. “Lad aka don shisha ka jingtreikam kaba shai ha ka MPSC, ka jingkylli ka mih balei ba lapmiet ban pynkylla ia ki jingkren/jingpynshai na ka Commission” ong u Bah Lambok haba thew sha ka jingbym bat ka MPSC ia ka kular bala ai sha ka Seng ban pyllait paidbah ia ki marks da kaba wanrah ia ka public notice.
“Ngim lah ban sngewthuh ia kum kaei kata ka jinghap buhrieh (privary) ba ki kren. Haba bun kiba iakhun ia ka MCS kila wan iakynduh ia ka KSU bad pynpaw ia ka jingdonkam ban pynthikna ia ka jingtreikam kaba shai ha ka jingthungkam da kaba sei paidbah ia ki marks jong ki, hynrei balei ka MPSC ka pyrshang ban buhrieh ia kane” ula buh jingkylli.
U Bah Lambok ula iathuh ba ka KSU ha ka 5 tarik Iaiong, 2018 kala iakynduh ia ka Sorkar Jylla bad kren da kaba shai ba ki jingthungkam ha ki kyrdan ka MPSC bad DSC ki dei ban long kiba shai bad ba khuid.
Une u Nongialam ka KSU ula pyntip ba ka KSU kan iai bteng ban iakhih tad haduh ba ka MPSC kala pyntreikam ia ki jing daw aka seng ban pynthikna ia ka jingthungkam kaba shai bad ban pynkut syndon ia ka jingthungkam bahaiing ne ba jied ia kiba ithuh ithaw.
“Ngim kwah ba ka MPSC kan dei ka jaka ban ialum pisa ne ka jaka ban pynsngewbha ia ki Myntri Sorkar, ki riew sain pyrthei he heh Ophisar. Ngi dawa ia ka jingtreikam kaba shai hapoh ka MPSC bad ngin nym ailad ia kum kane ka Tnad ba kan ialehkai bad ka lawei ki nongwadkam” ula ong.
