Tuklar ka High Court ia ka jingkyndang dukan madan ha Khyndailad | Bthah ban iabud ryntih ia ka Ain

Sub-Tang kiba ioh licence kin ioh shong dukan| Ym shah shuh ia ki bym don licence

Shillong Naitung 03: Ka Iingkashari Meghalaya High Court ha ka sngi Palei, kala tuklar ia ka jingkyndang ia ki nong shong dukan madan na ka thain Khyndailad (Police Bazar) bad kala bthah ia ki bor kiba dei khmih bad ia ki pulit ba kidei ban bud ryntih ia ki kyndon ain.

Ka Hawkers Association kala mudui sha ka iingkashari bad kynnoh ba kala don ka jingkyndang jubor khlem da pynbiang ia ki jaka ban shong dukan madan sha kiwei pat ki jaka.

Ha ka hukum kaba la pynmih hadien ka jingbishar ia ka PIL, ka Division Bench ka kynthup ia u Chief Justice IP Mukerji bad u Justice W Diengdoh kila thung ia u Senior Advocate u Subhasis Chakrawarty kum u Special Officer ban khmih ia ka jingpyntreikam ia kine ki kyndon jingbthah.

“Nalor kane, u Special Officer uba don ia ka jingtip kaba iar, ka jingshemphang ha ka kam, ka jinglong rangbah bad jingtbit, un pynthikna ba ka hukum kaba ngi lah pynmih ha kaba iadei bad kane ka Public Interest Litigation dei ban pyntreikam khlem kino kino ki jingpynkhein ia ka shongsuk shongsain lane leh ia kino kino ki kam kiba ktah” kala ong.

Ka Division Bench kala bthah ruh ia u Special Officer ban pynkhreh ia ka thup kyrteng jong kito ki nongshong dukan madan bala ioh jingithuh bad kiba la ioh ia ka lisen, ia kaba la ong ba ki don kumba 349, ha ryngkat ka jingiasyllok bad ka Hawkers Association bad ki bor kiba dei khmih.

Ka iingkashari kala bthah ba dei ban shah ia ki nongdie dukan madan ba kin die jingdie ha ka thain Police Bazar na ka bynta katto katne kynta (12:30 mynsngi haduh 2 baje mynsngi bad 7:30 mynmiet haduh 9 baje mynmiet), bad ki hap ban iasoi ia ka jingiateh ba kim dei ban shong palat ia ka por kaba la buh bad ban pynthud ia ka leit ka wan jong ki kali bad ka jingiaid ki briew. Ki nongdie dukan madan ki bym don lisen kin ym ioh ban shongdie jingdie ha katei ka thain.

“U Special Officer ryngkat bad u General Secretary jongka Association, ki bor kiba dei khmih bad ki bor pulit kin peit ba kine ki bym don lisen kim dei ban shong die jingdie ia kino kino ki mar ha kitei ki jaka. Lada ka don ka jingpynkhein, kumta u Special Officer ryngkat bad ki bor khmih bad ki bor pulit kim dei ban ai lad ia kino kino ki nongdie ban die ia ki mar ki mata ki jongki ha katei ka jaka” bad ka bynrap, “U General Secretary jong ka Association uba shah kynthuplang ha ka iingkashari u dei ban pynthikna ba ha ka por ba la pynkhreh ia ki jaka shong die jingdie da ki bor khmih ia kino kino ki nongdie madan, udei ban phah kynriah noh mardor. Lada ym leh, kumta yn hap ban kyndang na ka jaka kaba u shong die jingdie mardor hi”.

Ka iingkashari kala bthah ruh ia ki nongdie madan ba kin kynriah sha ki jaka kiba la pynkhreh da ki bor kiba dei khmih bad kiwei kiwei ki nongdie madan ki lah ban aplai ia ki lisen kiba thikna.

“Kiwei kiwei ki nongdie madan kin long kiba laitluid ba kin phah ia ki aplikeshon sha ki bor kiba dei khmih ban ioh ia ka lisen kaba pura ia kaba lah ban pdiang da kitei ki bor kiba dei khmih kaba iaid katkum ka ain. Hadien ba la ioh ia ka kaiphod na ki bor kiba dei khmih ha kaba iadei bad kitei ki aplikeshon kane ka iingkashari kan pdiang na ka bynta ban shim ia ki sienjam kiba tyngeh pyrshah ia ki”.

U Special Officer yn pynthikna ba kadei ban don ka jingpyntreikam kaba jai jai ia ka hukum jong ka iingkashari bad ban aiti ia ka kaiphod ha ka 5 tarik u Nailar 2025.