Shillong Risaw 24: Ki riewngeit Hindu kiba sah ha ka jylla bad ha ka nongbah Shillong, kila pynkut noh hynne ka sngi Hatmajai ia ka lehniam Durga Puja ha kaba da ki hajar ngut ki riewngeit Hindu na kylleng ki jaka, kila pyndep iaka jingpynngam um ne ka Bret Blei hapoh Wahumkhrah da ka jingsngewbha ha ryngkat bad ka shad kmen.
Kane ka jingleh niam kaba 4 sngi lynter, kala sdang naduh ka 21 tarik haduh ka 24 tarik u bnai Risaw bad la pynkut ia kane ka lehniam kana shisien shisnem da kaba pynngam noh ia ki Bleithaw ha ki wah.
Kane ka jingbret Bleithaw kala sdang naduh ka por mynstep ha kaba ki riewngeit Hindu hanongbah Shillong, kila iamih na la ki Puja Pandal ban bud iaka kali kaba kit iaka Bleithaw bad kila leit bret ia ki Bleithaw ha Wahumkhrah.
Ki nongialam jongka Central Puja Committee, kila iathuh ba mynta u snem, ki don 250 tylli ki Puja Mandal Committee ha ka jylla Meghalaya bad tang ha nongbah Shillong ki don 64 tylli bad haduh ka por 2:30 mynsngi kila don don kumba 18 tylli ki puja Pandal kiba la wan Bretblei ha Wahumkhrah, Shillong.
La sakhi ruh ba la pynjur ia ka jingpahara ha kylleng ki jaka ban py thikna ba kane ka jinglehniam lehrukom ki Hindu kan long kaba iaid beit iaid ryntih.
