Shillong, Jymmang 05 : Ka Kur Binong kaba na Ri Bhoi District hynne ka sngi Thohdieng kala pynlong ia ka jingthang mombati ne candlelight vigil ha Nongpoh MUDA Complex kum ka dak ban pynpaw iaka jingsngewsih halor ka jingkhlad jong ka samla Walinda Binong ha ka 27 tarik u Iaiong.
Ka Walinda kaba la don 19 snem ka rta kadei kaba pule iaka Fashion Designer ha Mody University, Rajasthan bad la shem ia ka ba kala iap hala ka kamra haka 27 tarik u Iaiong.
Ki bor sorkar ka jylla Rajhasthan kila pynbna ba kane ka samla kala shim hi iala ka jong ka jingim hadien ba kila pyndep iaka jingleh iaka Post-Mortem, hynrei ki bahaiing bahasem kila kyntait bad kim shym lah satia ban pdiang ba ka Walinda ba kan leh kumtei bad kila pynapw ruh ba ka Walinda kadei kaba stad bha bad kadei ban ioh pdiang ruh ia ka khusnam na ka college.
Ha katei ka jingthang mombati la wan ban iashimbynta da ki spah ngut ki paidbah ka thain Nongpoh ha kaba la iadonlang ki nongialam jong ka Hynniewtrep National Youth Front (HNYF), Nongpoh Area Women’s Welfare Association (NAWWA), Seng Samla bad kiwei kiwei.
Kine kiba la wan ban iashimbynta kila wan ban leh burom ia ka Walinda bad ban pynpaw iaka jingsngewlem iaka longing kaba la duh noh iala ka baieid bathoin.
