Shillong, Risaw 28 : Da ki hajar ngut ki Dkhot ka Federation of Khasi Jaintia & Garo People (FKJGP) bad ki Samla na kylleng ka Jylla, kila wan iashimbynta ha ka jingiaid paidbah ban pynsngew ia ka jingbynniaw halor ka jingkyrduh kam jong ki samla hapoh ka Jylla khamtam kito kiba la pyndep ia ki jingpule bapher bapher.
Kane ka jingiaid paidbah kala sdang na Motphran bad ki nongiaid paidbah kiba la pyrta ia ki slogan ryngkat ka rah ia ki placard, kila iaid lyngba ka Khyndai Lad, Iingsah u Lat, IGP Point, Barik-Dhankheti bad pynkut ha Madan Iew Rynghep shuwa ban pynlong ia ka jingialang paidbah.
Ha kane ka jingiaid paidbah, bun ki dukan jong ki Bar Jylla kila khang khyrdep noh naduh ki thain Motphran haduh Khyndailad namar ka jingsheptieng ioh mih kano kano ka huri hura.
Katto katne ki samla kiba la kah durkhmat ialade, kila jrongkti bad shoh ia ki bar jylla kiba ieng peitkai ha surok kynthup ruh ia ki nongniah kali ha ki thain Police Bazaar.
La ioh khubor ruh ba kila don katto katne tylli ki kali bad ki Scooty kiba la shah pynjulor naduh na Khyndai Lad shaduh Dhanketi.
Na ka liang ka bor District, kala pynjur bha ia ka jingpahara jong ki Pulit ha manla ki jaka ban tehlakam ia kano kano ka jingpyrshang ban pynkha ia ka jingkulmar kaba lah ban ktah ia ka shongsuk shongshngain.
