Gangtok, Risaw 28 : Ha kawei ka jingjia ka bym shym la poi pyrkhat kawei ka longkmie 34 snem rta kala ngat ha ka jingmynsaw jur hadien ba kala shah thombor ha kawei ka dngiem ha ki bynta jong ka Bermiok ha ka thain sepngi ka Sikkim, kata ha ka jaka kaba ki dngiem kim ju kham don.
Katkum u heh ka tnat forest la ong ba kila phah ia kawei ka kynhun sha katei ka jaka na ka bynta ban pynlong ka jingthwet ia katei ka dngiem bad ruh ban siat pyniohthiah ia ka.
Ia katei ka longkmie la pynkynriah noh mardor shapoh Gangtok STNM hospital na Rinchenpong hospital hadien ba la ai ia ka jingsumar kaba donkam kyrkieh.
Na ka liang ki heh ka tnat forest kila ong ba ia baroh ki jingdonkam kiba iadei bad ki lad jingsumar na ka bynta kane ka longkmie yn bei da kane ka tnat bad yn siew ruh ia ka bai lutksan halor jong kane ka jingjia.
