Shillong, Iaiong 15 : Ki laingut ki runar kiba shah kem halor ka jingdonkti ban tuh ia ka suloi 303 na ka kamra buh tiar jong ka karkhana MCCL ha Sohra, ki thmu ban die ia kane ka suloi ban ioh pisa, ong u Superintendent of Police ka East Khasi Hills Bah Vivek Syiem ha ka sngi Balang.
Ki Pulit kila ioh kurup ia ka suloi ba tuh, kaba don u nombor 3709740, na ka iing jong ka kong Alpha Mary Jyrwa, ka kmie-ieid jong uwei na kiba shah kem, na Mawkisyiem, Sohra.
Kane ka suloi la pyntip ba kala jah ha ka 11 tarik Iaiong.
“Ki Pulit ka Sohra Police Station kila shimkhia bha ban lapdien ia ki briew ba donkti bad khatduh hynnin ka sngi, kila ioh kem ia laingut” ong u Bah Vivek.
Kine ki laingut ki kyrteng u Shaiborlang Jyrwa, Sawbor Sooting bad u Teilang Sohkhia.
“Ka jingthmu hi ka long ba kin ioh die sha ki briew kiba siat mrad ne sim. Ka jingmut jong ki ka long ba kin ioh pisa n aka. Mano mano ba kwah ban thied tiar siat, khamtam kito kiba kwah ban leit sikar ki lah ban pyndonkam ia ka” ula ong.
U SP u pyntip ba ka jingtohkit ia kine ki laingut ka dang iaid shakhmat haba bynrap “Ngin nang tohkit shuh shuh ia ki.
