Shillong, Iaiong 15 : Ki Pulit ka Jylla kila ioh phra sngi ban tohkit ia u Kennedy Khongsit, halor ka jingdonkti ban pyniap ia ka longkmie ba 39 snem ha Nongrah, bad kila dep ruh ban ialam ia une u briew sha ka jaka ba u pyniap ban phah batai bad pynwandur ia kane ka kam bymman.
Haba pyntip ia kane ha ka sngi Balang, u Superintendent of Police ka East Khasi Hills Bah Vivek Syiem ula iathuh ba u Kennedy Khongsit, uba shah kem dang shen ba pyniap ia u heprit 7 snem, ula shah phah sha ka police custody ba phra sngi halor ka jingpyniap ia ka longkmie ba 39 snem, ka kong Eilang Phawa.
“Ngi la ioh phra sngi ban tohkit ia u Kennedy Khongsit halor kane ka kam, ngi la dep tohkit bun kiei kiei bad mynta ka sngi ngi la ialam ia u sha ka jaka ba u pyniap ba un batai nadong nadong hadien ba ula kubur ba leh ia kane ka kam bymman” ong u Bah Vivek.
Haba batai bniah ia ka jingphah pynwandur ia kaei kaba jia, u SP ula ong ba u Kennedy ula ialam ia ka kynhun ki Pulit sha ka jaka ba u pyniap ha ka jingiadonlang ki nongsakhi shimet.
“Ula ialam ia ka kynhun ki Pulit ha ka jingdonlang ki sakhi shimet bad ula batai ba kumno ula leh ia kane ka kam bymman ha kaba ula ialam ia ka sha lyndet ka Iing, sha ka jaka leit bar paidbah bad tangon ia ka ha kawei na ki kynroh maw bad hadien ula thep ia ka met ha byrni. Kane ka dei kaei kaba ula batai” ula ong.
U Bah Vivek u iathuh ba ka kynhun Special Investigation Team (SIT) ka la trei shaid shaid ban pyndep noh shen ia ka chargesheet.
