Agartala, Nohprah 26 : Haduh 17 tylli ki Iing jong ki Khristan kiba dei na Tripura, kila shah thang dusmon ha ki riewshit niam ha Bandarban District ka Bangladesh ha ka step 25 tarik Nohprah, kaba la pynrit mynsiem ia ka jingrakhe Khristmas ha ka thain.
Ka Rights and Risks Analysis Group (RRAG), ka kynhun ki riewkhraw pyrthei na New Delhi-kila dawa ban tuklar da ka US Commission on International Religious Freedom (USCIRF) bad ka European Union bad leh eiei halor ka jingiohroit ia ka hok jong ki ritpaid.
Kane ka jingwiang ding kala jia ha Notun Tongjhiri Tripura Para ha ka Lama Upazila jong ka Chittagong Hill Tracts, ha ka por kumba 12:30 baje eiei mynstep, kaba la jia ruh hadien ba ki paid Khristan kila mih nala shnong ban leit rakhe Khirstmas sha ki shnong ba marjan kaba don ia ka Iingmane.
La suba jur ba ki kynhun pyntriem Muslim kiba donkti ha kane ka kam watla kam pat shym la don ka jingkrem briew iano iano ruh.
Kine ki 17 tylli ki Longiing ki dei jong ki Nong Tripura. Watla kine ki trai iing kila leit buh ia ka jingujor, ki Pulit ka thain ba la iala da u Inspector Md Enamul Haque Bhuiyan, um pat shym la kem briew satia pynban ula kynnoh kylla da kaba ong ba kine ki kam pyntriem ki dei ki kam sain pyrthei kiba don jingiadei bad ka Sorkar Awami Leaque kaba la shah weng na ka bor.
U Director ka RRAG Suhas Chakma ula pynrem jur ia ka Sorkar ba shipor ka Ri Bangladesh bad ong “Ka la long ka raibi ia kane ka Sorkar ba shipor ban kynnoh ia ki kam thombor ia ki briew na ki niam ba ritpaid halor ka jingdon jingiadei jong ki bad ka Awami League, khlem da pynlong ia ka jingtohkit kaba thikna.
