Agartala, Naiwieng 29: Ka Twipra Indigenous Students’ Federation (TISF) hynne ka sngi Thohdieng, ka la pynlong ïa ka jingïakhih ban pyrshah ïa ka jingthmu jong ka Sorkar jylla ban pynlong iing shimet ïa ka ïing Syiem Pushpabanta daka jingthmu ruh ban pynkylla ïa ka sha ka hotel 5-Star hapoh ka Taj Group.
La iohi ba ki nongïakhih kiba la bat ïala ki Placard bad ki Banner ki la ïaid hapoh ka Nongbah bad ki la ïalum lang hakhmat ka ïing sah u Myntri Rangbah ka Jylla u Manik Saha ban dawa weng noh mardor ïa ka rai pynkylla iing shimet iaka ïing Syiem Pushpabanta.
Ka kynhun ba la ïalam da u nongialam ka TISF u James Debbarma bad u MLA ka TIPRA u Motha u Biswajit Kaloi, ki la aiti daka dorkhas shaka tnat Tourism da kaba kyntu ïa ka Sorkar ban pynneh pynsah ïa ka pateng bad ka kolshor jong kane ka ïing syiem.
Ka jingïakynad ka la nangjur shuh shuh haba ki nongïakhih ki la ïoh jingtip ba u Myntri ka tnat Tourism u Sushanta Chowdhury u la pynksan ïa kane ka rai haba ïakren bad ki nongthoh khubor ha ka Secretariat.
Ban pynpaw ka jingbitar bad pyrshah ïa kane ka rai, ki nongïakhih ki la tur sha ïing sah u Myntri Rangbah ka Jylla Manik Saha, da kaba khang ïa ki surok bad pyrta kyntien pynrem iaka Sorkar.
“Ka jingleh jong ka Sorkar ban pynlong kam khaii ia ka jaka kaba don kum kane ka jingdonkam ha ka histori ka long kaba ym lah ban pdiang. Ngin ym ailad ba ia ka iing syiem ban long ka iing sah ki nongwan shangkai suwari. Ngim pyrshah iaka roi ka par bad ka Sorkar ka lah ban mang jaka na ka bynta ban tei hotel” la ong u James Debbarma.
