Shillong, Naiwieng 29 : Ka Congress kaba don ha Liang Pyrshah, kala rai ba shen kan sa leit mudui da ka mukotduma sha Iingkashari Meghalaya High Court, ban kyrpad mait kyrteng noh ia ka jinglong MLA ki 3 ngut ki MLA ka party ba phetseng sha ka National People’s Party (NPP).
Kane ka rai kala mih hadien ba u Lamphang ka Iingdorbar Thaw Ain Thomas A Sangma ha ka sngi Balang, ula ieng skhem ha ka nongrim ban pdiang ia ka jingleit iasoh ki 3 ngut ki MLA ka Congress sha ka NPP haba ong ruh ba u pdiang ia kino kino kiba leit mudui pyrshah ia kane ka rai.
Haba iakren bad ki nongthoh khubor ha ka sngi Thohdieng, u MLA ba marwei ka Congress bad Chief Whip ka Liang Pyrshah Bah Ronnie V Lyngdoh ula ong ba ka party ka dang iasyllok bad ki stad ain ban leit sha Iingkashari pyrshah ia kane ka rai u Lamphang.
“Ngin sa shimkhia bad ngin sa mudui da ka mukotduma ha Iingkashari High Court bad ngin sa peit ia kaei ka sienjam ba ngin shim pat hadien. Mynta ngi dang pynkhreh bad lehse ha kine ki khyndiat sngi, ngin sa leit mudui namar ngi dang iasyllok bad ki stad ain bad kane ka kynhun ka dang leit sha Delhi ban iakynduh iaki stad ain kiba tip bha shaphang ka ain kyntiap seng” ula ong.
Ka Congress kala ujor ia artylli ki mudui-kawei ka long pyrshah ia ki MLA ba sospon-Bah Charles Marngar (Mawhati) bad Ganbriel Wahlang (Nongstoin) bad kawei pat ka long pyrshah ia u Dr Celestine Lyngdoh (Umsning)-hadien ba kila leit pyniasoh sha ka NPP ha ka 19 tarik Nailar. Congress
