Agartala, K’Lyngkot 16: U Myntri Rangbah ka jylla Tripura Manik Saha ha ka sngi Thohdieng u la ong ba ka sorkar Assam ruh ka angnud ban shalan ia ka bording kaba tam sha ka ri Bangladesh.
Haba kren sha ki lad pathai khubor ha ka sngi Thohdieng u Saha u la ong.“Ha ka jingiakren ka jong ngi u Sarma u la pynpaw ia ka jingkwah ban ai ia ka bording kaba la tam na Assam bad ka ri Bangladesh.Naduh u snem 2016, ka jylla Tripura kala supply bording sha ka Bangladesh, bad ki la buh kyndon hapoh ka Memorandum of Understanding (MoU) ha kaba iadei bad kane ka kam bad kane ka kut noh ha u bnai Lber mynta u snem.Ngi lah ban pynjlan biang ia ka samoi jong ka MoU,”.
U Saha u la ong bad u la dep ban ia kren na ka bynta ban pynheh ia ka surok National Highway ka ban pynïasoh ia ka Tripura bad ka Assam.
“Dang shen nga la leit jngoh ïa ka Churaibari kaba don ha ka thaiñ shatei lam mihngi jong ka Tripura ha shilynter ka khappud Assam bad nga la ïohi ba ka surok National Highway kaba khim hapdeng kine ki ar tylli ki jylla bad ka buh jingeh haduh katta katta ïa ka leit ka wan jong ki trok kit mar, ki bos kit nongleit nongwan bad kiwei kiwei ki kali. Kane ka surok bah ka donkam ban pynheh na ka bynta ka jingïaid beit ïaid ryntih jong ki kali bapher bapher,” u la ong.
Ka Tripura ka la sdang ban pynpoi bor ding 100 MW sha ka ri Bangladesh na ka jaka pynmih bor ding jong ka sorkar ONGC Tripura Power Company (OTPC) kaba don ha ka thaiñ Gomati jong ka Tripura ha ka thain shatei lam mihngi ha u bnai Lber 2016.
Ka jingsupply teng teng ka kiew haduh 160 MW, la ong u heh ophisar ka Tripura State Electricity Corporation Limited (TSECL).
“Hadien ka jingïateh ba nyngkong kata ha u snem 2016, hadien kata ngi la pynthymmai ïa ka jingïateh arsien ban bteng ïa ka jingpynpoi bording sha Bangladesh,” ong uwei u heh sorkar.
U Myntri Rangbah ka Assam, u Himanta Biswa Sarma, uba la wan poi hangne ha ka sngi Palei ha ka jingleit jngoh kaba ar sngi ia ka Tripura, ula bam ja miet bad u paralok jongu na Tripura ha ka official bungalow ha ka miet sngi Palei, ha kaba ki la ïakren ïa ki mat bapher bapher kiba ïadei bad kine ki ar tylli ki jylla.
