Tripura | Kynnoh ka TISF ba ialam bakla ki Pulit ka Uttarakhand halor ka jingiap u Angel Chakma

Agartala, Nohprah 31: Ka Tipra Indigenous Students Federation (TISF) ha ka sngi Balang kala kynnoh ba ka jingtohkit jong ki pulit ka Uttarakhand halor ka jingkhlad u Angel Chakma kadei kaba ialam bakla da ka jingthmu ban pyntlot noh ia ka jingkynnoh sngewpher jaitbynriew ha kane ka kam bymman.

Haba pynpaw ia ka jingbym sngewhun ha kaba iadei bad ka jingkynthoh jong ki Pulit, u Sarja Debbarma uba dei u President ka TISF u la ong, ba ka jingtohkit ka paw kumba ka pyrshang ban kyntait ia ka hok jong u lanot da kaba pynrit ia ka bynta jong ka jingshah lehbein tang namar ba sngewpher jaitbynriew.

“Ngim sngewhun ïa ka jingkynthoh jong ki Pulit ka Uttarakhand.Ka long kaba ïalam bakla bad kumba la leh khnang ban tap eit miaw ïa ka jingshah kynnoh sngewpher jaitbynriew ia kaba ki briew na ka thaiñ Shatei Lam mih ngi ki ïakynduh man ka por ha kiwei pat ki bynta jong ka Ri India,” ong u Debbarma.

U la pyrshah ia ka jingkynnoh ki pulit ba katei ka jingjia kam don jingiadei bad ka jingsngewpher jaitbynriew,da kaba kdew ba ki bor pyniaid ki la pynpaw ba uwei u nongshah kynnoh u dei na Manipur bad uwei pat u nongshah kynnoh uba la phet krad u dei na Nepal.

“Kane baroh ka long ka ba ialam bakla lut.Hadien ba la pynshisha bad ki para jong ngi na Manipur, ngi kwah ban pynshai ba u nongshah kynnoh ba la ong ba u dei na Manipur, um dei u trai ri Manipuri. U shu sah hangtei bad u dei u briew bym dei trai ri trai muluk, uba dei na ka jaidbynriew Brahmin kiba dei na ka Bihar”, la bynrap u Debbarma allege.

Shuh shuh u la kynnoh ba ki nongshah kynnoh ki kit ïa kajuh ka “jingmut jingpyrkhat kaba pynkhihwin bad kaba pynïapher” kaba ju pynleit jingmut pyrshah ïa ki briew na ka thaiñ Shatei Lam Mihngi.

Haba phai bad ki nong Nepal kiba shah kynnoh, u Debbarma u la ong ba ka jinglong trai ri kam don jingiadei bad kane ka mat ba kongsan.

“Ka jingkylli kam dei na kano ka jaka ba ki nongshah kynnoh ki wan, hynrei kumno ki shim ia ngi.Ki jingkren bein jaitbynriew ka shong ha ka dur khmat. Ngi dei ki riewlum, bad maki kim dei—bad tang kata ka jingiapher ka biang ia ki ban thmu ne (target) ia ngi,” u la ong.

U Debbarma u la ban jur ba ki jaitbynriew riewlum na ka thain shatei lam mihngi ki iakynduh ia ka jingshah lehbein khamtam eh namar ka jinglong ka dur ka dar jong ki.
“Ki jaidbynriew ki bym dei riewlum kiba sah ha k jylla ka thaiñ Shatei Lam mihngi kim ju mad ïa kum kine ki jingshah lehbeiñ namar ba kim long kum ma ngi.Ngi dei ki nong India, hynrei bun ki dang ïohi ïa ngi kum ki briew kiba nabar,” u la bynrap.

U Angel Chakma, uba dei u samla pule MBA, ba dang 24 snem ka rta, uba na na ka jylla Tripura, ula khlad noh ha ka 26 tarik u Nohprah, 2025, hadien ka jingmynsaw, ha ka jingshah thombor ha Dehradun, ia kaba la kynnoh ba ka dei ka daw jong ka jingsngewpher jaitbynriew.

La iathuh ba katei ka jingjia, ka la jia ha ka 9 tarik u Nohprah, ha kawei ka canteen ha Selaqui, ha kaba la ong ba u Angel u don lang bad u hynmen jong u, u Michael Chakma, ki la shah kren bein, halor ka jaitbynriew. Haba ki la pynpaw ba kidei ki nong India, hynrei la kynnoh ba kawei ka kynhun jong ki shynrang ki la thombor ia ki da kaba pyndonkam da ki tiar bad ki wait.

Kumba long haduh mynta, la kem ia 5ngut ki la shah suba, katba u nongshah kynnoh ba ha khmat eh, u Yagya Awasthi, u dang phet rieh.Kane ka jingjia ka la mih ka jingbitar ha ka ri baroh kawei, ha kaba la kyrpad ïa ki aiñ kiba kham pyrkhing bad ban weng ïa ka jingsngewpher jaitbynriew bad ban pynthikna ïa ka jingshngaiñ jong ki samla pule na ka thaiñ shatei lam mihngi.