Agartala, Jymmang 05 : Ki Pulit ka Dhalai District, Tripura, kila ioh kem haduh 16 ngut ki nong Bangladesh kynthup ia 5 ngut ki Khyllung khynnah na ki artylli ki jaka hadien ba kila prong tuh sha India.
Kat kum ka khubor Pulit ka Gandacherra Police Station ha Dhalai, kila ioh jingtip ia ka jingwan rung tuh kine ki briew bad halor ka khubor ba paka bha, kila ioh bat ia 11 ngut ki nong Bangla kynthup ia 3 ngut ki khynnah na Mas Kumbhir Para.
Ki Pulit kila kurup noh ia ki ticket, ki kot ki sla bala dep injek covid, kiba la ai da ka Sorkar Bangladesh lem bad katto katne ka pisa Bangladesh.
Kat kum ka jingiathuh ki Pulit, kine ki briew kila wan rung na khappud ka Hakimpur kaba don ha khappud ka India-Bangladesh ha West Bengal ban wad kam la lai snem mynshuwa. Kila leit ruh sha Bangalore ban wadkam.
“Hadien ba ki sah hangtei ha kine ki snem, kila wan poi ha Howrah, West Bengal da ka rel na Bangalore ha ka 30 tarik Iaiong ban leit phai pat sha Bangladesh. Kila don jingthmu ban leit phai sha Bangladesh hadien ba ki sah ha Mas Kumbhir Para hynrei kila shah bat noh ha ki Pulit” ong ki heh Pulit.
Ha kawei pat ka jingkhynra, ki Pulit ka Tripura ha ryngkat ki Pulit ka Railway kila ioh kem ia 5 ngut ki nong Bangladesh kynthup ia arngut ki khynnah n aka Ambassa Railway Station kaba don ha Dhalai District, Tripura.
