Agartala, Naitung 19 : U Nongialam ka Congress ha Lok Sabha, Gaurav Gagoi ula kyntu ia u Lat ka Jylla Tripura ba un tuklar lang halor ka kam iaumsnam kaba mih na ka elekshon Panchayat hapoh ka Jylla.
U Gagoi lem bad u Myntri barim ka Sorkar Pdeng, Tariq Anwar nalor kiwei kiwei ki nongialam, kila iakynduh ia u Lat ka Jylla Tripura, Indra Sena Reddy Nallu ban iakren halor ka jinglong jingman kaba ktah ia ka elekshon Panchayat ha Jylla namar ki kam umsnam kiba jia ha kylleng ki jaka.
U Gaurav Gagoi ula pynpaw ia ka jingsngewkhia jong ka Congress bad ong ba ka party kam kwah ia ka thma iapher jaidbynriew jong ka Manipur ba kan jia ha Tripura. Ka party kala ban jur ba dei ban don ka jingleh hok ia baroh ki Jaidbynriew jong ka Jylla.
Haba iakren bad ki nongthoh khubor, u Gagoiula ban jur ba ka congress ka kwah ia ka jingbishar kaba hok halor ki samla kiba shah pyniap bad ia kito ki iing, ki dukan bad ki nongkynti kiba la shah thang ne shah pynjulor ha ka thma iapher jaidbynriew kaba jia ha Ganda Twisa, Tripura.
“Ki Nongialam jong ngi ha Tripura kila iai pyntip sha ki Pulit halor ki kam umsnam ha Ganda Twisa bad ki jingjia kiba iadei bad ka elekshon Panchayat, hynrei ka Sorkar kam shym la leh eiei pyrshah ia ki briew kiba donkti” ula ong.
U Gagoi ula bynrap “U Myntri Rangbah Duh Narendra Modi u ju ong ba ka India ka dei ka Model jong ka Synshar Paidbah. Namar kata, ngi kyntu ia ka Sorkar ban pynthikna ba ka Tripura kan bud ia ki kyndon jong ka Riti Synshar Paidbah”.
Ula dawa ruh ia ka jingtuklar u Lat ka Jylla da kaba ong “Ki kyrtong jong ngi kila shah khang ban leit thep kyrteng ha kiba bun ki constituency. Ngi thmu ban ai ia ka dorkhas kaba batai bniah sha u Lat ka Jylla ha ka sngi Thohdieng”.
Kat kum ka jingkhein ba ai ki bor Sorkar, palat 40 tylli ki Iing, 30 tylli ki dukan bad bun tylli ki kali kila shah thang ne shah pynjulor ha ki kynhun thombor hapoh ka thain Ganda Twisa, kaba jngai kumba 130 km shathie lam mihngi ka Agartala.
Palat 300 ngut ki nongshongshnong kila leit riehtngen ha ki jaka sah ba shipor ka Sorkar namar kane ka kam umsnam. Ka Sorkar Tripura kala pynbna iaka song ba T.1.60 klur kum ka jingsiew bai lutksan sha ki 166 tylli ki Longiing ba shah ktah.
