Shillong, Naitung 19 : Ka seng Hynniewtrep Youth Council (HYC) kala bthah ia baroh ki jylli treikam (Circle/Unit) ba kin khang ban nym ailad ia ki briew na Bangladesh ba kin wan rung kum ki phetwir sha u pud u sam ka Ri-lum Khasi Jaintia.
Kane ka jingbthah kala mih na u President ka HYC Bah Roykupar Synrem, uba la phah da ka shithi sha baroh ki Nongialam bad ki dkhot ka Seng hangne ha ka Bri U Hynniewtrep.
Kat kum ka shithi, u Bah Roykupar ula ong ba ka jingiakynad bad ka jingthut ka shongsuk shongsain ha ri Bangladesh, ki bar ri, ki lah ban shim kabu ia ka jinglong jingman ha katei ka ri bad kin wad rung bad buhai shnong hapoh ka Ri-lum Khasi kum ki phetwir.
“Nga kyntu ia ki shipai ka Seng ba phin iapeit pyrman bha ha ki jylli treikam ki jong phi ha ryngkat bad ki bor shnong, ki bor hima ban pynthikna ba ki bar ri kiba lah ban shim kabu ia ka jinglong jingman ha katei ka ri, kin wan rung bad buhai shnong hapoh ka Ri-lum baieid jong ngi” ong u Bah Roy ha ka shithi.
“Kiba kum kitei ki briew ki lah ban shim kabu ha kum kane ka por ban wan rung kum kita ki phetwir ban wad jaka sah shipor hynrei suki suki kin kylla long ki nongshongshnong ba pura bad hangta kan sa eh than ba ngin ia beh ia ki” ula bynrap.
U Bah Roykupar ula ong “Namarkata to ngin phikir bha bad pyneh beit triang ba ym dei ban ailad ba kin wan buhai shnong la kum ki phetwir ne ki nongwan sah shipor ha kane ka Ri baieid eh ka jong ngi”.
“Tur Shaphrang Shipai ka Ri ” ula pynkut.
 kala bthah ia baroh ki jylli treikam (Circle/Unit) ba kin khang ban nym ailad ia ki briew na Bangladesh ba kin wan rung kum ki phetwir sha u pud u sam ka Ri-lum Khasi Jaintia.){kind=link}