Shillong, Iaiong 01 : Ka Hynniewtrep Integrated Territorial Organisation (HITO) ha ka sngi Ba-ar, kala dawa ia ka Executive Committee ka Voice of the People Party (VPP) ha Khasi Hills Autonomous District Council (KHADC) ba kan pynlong ia ka jingtohkit ba bniah bad leh tyngeh pyrshah iaka jinglum khajna be-ain da ki khyrdop ka Council.
Ha ka shithi bala phah sha u CEM ka KHADC Bah S Rynjah, ka HITO kala ong “(Ngi dawa) ia ka jingtohkit bam ardor halor kine ki jingleh bym hok, dei ban shim da ka lynti ka ain pyrshah ia kiba donkti bad pynduh noh ia ki tender bad contract bala bat da ki trai jong ki khyrdop kiba shem leh thok, bad pynthikna ba kin nym iohlad shuh ban aplai ia ki tender lane contract shirta”.
Kane ka jingdawa kala mih hadien ba kane ka Seng kala ioh pdiang ia ka jingtip halor ka jinglum khajna beain da ki katto katne ki briew kiba don ha ki khyrdop ka KHADC, khamtam ia kitp kiba lum khajna na ki kali kiba kit mar.
Ha ka jingwad ia ka jingshisha bad ka hok, ka HITO ka la ong ba ka la pynlong ia ka jingjurip ha ki khyrdop khlaw jong ka KHADC ha Puriang, East Khasi Hills district, ha kaba ngi la lap ia ki sakhi kiba biang kiba pynskhem ia kine ki jingkynnoh kiba khia.
“Ka jingtohkit jong ngi ka la pynpaw ba uwei u briew uba don ka jingkitkhlieh na ka bynta ki kam ha ka khyrdop talasi u la lum pisa be-aiñ na ki kali kiba ïaid lyngba ïa ka surok bah. Kaba pynsngewsih ka long ba ki nongñiah kali kiba pyrshah ïa kane ka jinglum pisa donbor ki la shah byrngem ban kurup ïa ki mar jong ki, kaba la wanrah ia ka jinglong jingman ba pyntieng bad jingpynbor,” la ong ha ka shithi bad bynrap “Kala wan sha ka jingtip ba trai jong kane ka khyrdop ula ai ka hukum ia ki nongtrei, kaba pynbor ia ki ban pyntreikam ia kum kine ki kam bamsap”.
Kane ka jingleh donbot ka long ruh wat ia ki kali kamai, haba pynlong sohpdung ia ki nongtrei bad ki nongbylla sngi kiba shaniah ia ka kamai kajuh da kaba khaii ia ki mar ba kongsan kynthup ia u rnga bad ki lyntang. Kum kine ki jingleh ka pynpaw ia ka jingbamsap kaba jur bad ka jingleh donbor kaba la pyni da kito kiba trei ha ki khyrdop.
Nalor kane, ka HITO ka la kam ba kane ka jingai khubor jong ka Seng ka dei kaba la pynshong nongrim na ki sakhi bala kyrshan ruh da ki nongai sakhi bad ba ymdei ban niew ia ka kum ki jingkam bym lah pynshisha. Ngi long kiba kloi ban wanrah ia ki sakhi satar bad ki jingai sakhi ban pynshisha ia kine kiei kiei baroh haba donkam.
Kaba sngewsih, kane ka jingjia kam dei kaba shu jia tyngkhat, ka dei ka jingpynibor kaba la phai lyndet da ka bor synshar ka Council kiba la leit noh, kaba wanrah ia ka jingjynjar ia ki nongtrei bylla bad ki dkhot ba trei shitom jong ka imlang sahlang.
“Namar kata, ngi kyntu ia phi ban shikhia pyrshah ia kito kiba donkti la ka dei ki trai lane ki nongtrei jong ki khyrdop” kala ong.
 ha ka sngi Ba-ar, kala dawa ia ka Executive Committee ka Voice of the People Party (VPP) ha Khasi Hills Autonomous District Council (KHADC) ba kan pynlong ia ka jingtohkit ba bniah bad leh tyngeh pyrshah iaka jinglum khajna be-ain da ki khyrdop ka Council.){kind=link}