Rakhe ka AFAWKHD ïa ka lyngkhuh snem ka seng
Nongstoiñ, Nailur 22: Ka seng jong ki misteri dieng (furniture) kiba don hapoh ka shatri jong ka All Furniture Association West Khasi Hills District (AFAWKHD), kila rakhe lehkmen ïa ka lyngkhuh dap snem jong ka seng hynnin ka sngi Balang bad la pynshongkun da ka jingiadonlang u MDC ka Nongstoin Gabriel Wahlang.
Ia kane ka jingrakhe la pynlong Mecofed Hall Nongstoiñ ha kaba ki mistiri dieng na kylleng ki jaka kila wan ban iashimbynta ha ryngkat ka jingiadonlang ki Ophisar na ka Tnad Labour, ka Tnad Khlaw, ka Tnad Industries bad kiwei kiwei. Ha kane ka jingialang, kane ka seng kala pynkup burom ïa ki san ngut ki nongtrei furniture kiba la kham san ha ka kam bad kiba la kham noh ruh ha ka karta.
Kum ka dak jong ka jingrakhe ïa katei ka sngi kaba kyrpang jong ka seng, ka kynhun ka la ïoh ruh ban ot ruh ïa u cake ha kaba u kongsan ryngkat ka jingïasynranlang u bah S.Kharjahrin President ka All Furniture Assocïation West Khasi Hills District, ki la ïoh ban ïashim bynta lang ban ot ïa utei u cake bad ban sam ïa baroh lang.
U kongsan haba ai jingkren u la ong, “Ka jingdon jong ka Association kan long ka jingmyntoi ïa baroh kiba trei ïa kum kane ka kam. To ai ba ka jingsdang na I ba rit phin san ha ki kam sha kaba heh, suki pa suki. To ngin beh ruh ïa ka thong ban kham lah ban ïa kiwei ki nongtrei furniture kiba nabar jylla, namar bun sien nga ïohi ba ki khasi ki I tynnad ïa ki tiar kiba wan nabar kiba la thaw da kiwei”.
“Hynrei balei ngim buh ïa ka thong ba ngin shna ïa kaba kham itynnad ban ïa jong kiwei bad la dei ruh ka por ba phin kham pyntbit shuh shuh, khnang ban ïoh ruh ban ai jinghikai ïa kiba nadien, namar kam dei shuh ba ngin dang ap tang ka kam sorkar hynrei ngi hap ban nang ban ïeng ha la ki kjat”.
