Shillong, Rymphang 27 : Ka Myntri ka kam rep ka Jylla Kong Ampareen Lyngdoh kala iathuh ba ka Tnad kala tip ba ka don ka jinghiar jong ka dor u synsar hapoh ka Jylla.
Haba jubab ia ka jingkylli ha Iingdorbar Thaw Ain, ka Myntri kala iathuh baka daw ka long ba ki Jylla ba marjan kata ka Assam, Mizoram, Tripura bad Arunahcal Pradesh kila pynkiew bha ia ka jingpynmih synsar hala ki jong ki Jylla ha kine ki 2-3 snem.
Ka pyntip ba ka jingeh jong ka jaka rep synsar ha Meghalaya ruh kala nang kiew. Ka jingkynshew (stock) synsar ba naduh u snem bala leit, ka dang don ha ki kudam. Ka jingkiew ka jingpynmih synsar na ki Jylla ba marjan kala nang pynbun ia ka mar ha Iew, kaba la lam pat sha ka jinghiar dor u synsar”.
Halor ki sienjam bala shim ban leh eiei halor kane ka jinghiar dor, ka Myntri kala iathuh ba ka Mawiong Wholesale Market ka don ia ki kudam ba ngiam ban thep palat 21,000 MT. Bun na kine ki kudam la pyndonkam ban buh ia ki synsar bala thad ha ka por ba hiar dor u synsar, kumta kala plie lad ia ki nongrep ba kin ioh kham heh ka dor”.
Ka jingpoi mar manla ka sngi bad ka dor iew jong u synsar la ju thep ha ka AGMARKET portal bad MEGAMB portal kaba lah ban iohi lut da ki paidbah/nongrep ba kin tip ia ka dor ka mur.
