Shillong, Rymphang 08 : U Pope Francis ula thung ia u Rev. Bernard Laloo kum u Auxiliary Bishop jong ka Archdiocese ka Shillong.
Haduh mynta u Rev. Laloo ula shakri kum u Chancellor jong ka Archdiocese.
U Rev. Laloo ba kha ha ka 16 tarik u Jylliew 1976 ha Laitlyngkot, Meghalaya, ula shah pynkyntang kum u phadar ha ka 30 tarik u Iaiong 2006 na ka bynta ka Archdiocese ka Shillong.
Ha ki snem kiba la dep, ula bat ia ki kam ha ki kyrdan bapher bapher kaba kynthup kum u Assistant ka St. Paul’s Church, Upper Shillong (2006-2007), Administrator ka Christ the King College, Shillong (2008), bad u Dean of Studies ka St. Paul’s Seminary, Shillong (2009-2015).
Ula shakri kum u Principal ka Divine Saviour Higher Secondary School, Laitumkhrah (2015-2016) bad hadien kum u Director jong ka Social Service Center, Shillong (2017-2021).
U Rev. Laloo uba la don bynta ha ki kynhun bapher bapher, ula shakri kum u Board Member ka Caritas India (2021-2024) bad ula bat ia ka kyrdan ha ka Farmers’ Commission bad ka State Tuberculosis Co-morbidity Coordination Committee hapoh ka sorkar Meghalaya.
Naduh u snem 2022, ula long u Chancellor ka Archdiocese of Shillong bad Parish Priest jong ka Cathedral of Mary Help of Christians, Laitumkhrah.
Ha ka liang ka pule puthi, ula pyndep ia ka Bachelor Degree ha ka Education bad ka Master Degree ha ka Sociology, ryngkat bad ka Post Graduate Diploma ha ka Counselling Psychology.
Ka jingpynbna ia kane ka jingthung kadei kaba la pynbna paidbah ha Rome ha ka sngi Saitjain ha ka por 12 baje katba ha ka CBCI Centre ha New Delhi ha ka por 16:30 ha ri India.
