Shillong, Jylliew 08 : U Lamphang ka Iingdorbar Thaw Ain Thomas A Sangma hynne ka sngi Palei, ula thung ia u MLA ka Congress Bah Ronnie V Lyngdoh kum u Nongialam ka Liang Pyrshah bad u Saleng A Sangma kum u Chief Whip ka Liang Pyrshah.
Kat kum ka jingpynbna bala pynmih da u Commissioner & Secretary ka Assembly Bah Andrew Simon, kala ong ba u MLA ka Mylliem Bah Ronnie V Lyngdoh ula ioh ia ka jingithuh da u Lamphang kum u Nongialam ka Liang Pyrshah bad u MLA ka Gambegre Saleng A Sangme ula ioh ia ka jingithuh kum u Chief Whip ka Liang Pyrshah.
Kane kala wan jia hadien ba ka Congress bad ka AITC bala ialam da u Myntri Rangbah barim Dr Mukul Sangma, kiba don mar 5 ngut ki MLA, kila thoh sha u Lamphang ban ai ka jingithuh.
Shuwa kane, u Lamphang u khlem lah satia ban shim rai ba mano ban long u Nongialam ka Liang Pyrshah ha Iingdorbar namar kat kum ka rule, ka seng sain pyrthei kaba mihkhmay da u Nongialam ka Liang Pyrshah ka dei ban don ym duna oa 10 ngut ki MLA ha ka Iingdorbar ban ioh ia ka jingithuh.
Hynrei ka Liang Pyrshah ha ka Iingdorbar thaw ain ka Jylla ki kunthup ia ka Congress bad ka TMC kiba don mar 5 ngut ki MLA lem bad ka VPP kala don tang 4 ngut ki MLA, kaba long hapoh ka 10 ngut.
