Shillong, Risaw 09 : U Symbud Myntri Rangbah ka tnad kam Pohiing (Police) Bah Prestone Tynsong ula iathuh ba ki Pulit kila thaw ia ka Special Investigation Team (SIT) ban tohkit ia ka jingshah pyniap u khynnah 7 snem ha Nongrah bad kular ia ka jingkem kloi ia ki nongleh bymman kiba donkti ha kane ka kam pyntriem ba shyrkhei.
“Hooid, la dep thaw ia ka SIT hapoh ka jingialam u Superintendent of Police ka East Khasi Hills bad ka jingtohkit mynta ka la iaid shakhmat” ong u Bah Prestone haba iakren bad ki lad pathai khubor ha ka sngi Palei.
“…ngan iathuh ha phi kawei ba hen ngin sa ioh ban kem ia kiba donkti bad sa tip lut ia kine ki kam bymman kiba jia” ula kular.
Ka metiap jong u Khynnah 7 snem Kyrshanbor Kharmudai, uba la jah rngai nala iing na Nongrah ha ka janmiet sngi Balang, la lap na ka khlaw Mawpat ha ka step sngi Palei.
“Ngi dang ap ia ka kaiphod jong ka post mortem (hynrei ki dak ba paw na ka jingtohkit ba malu mala) ka pyni ba ka dei ka jingshah pyniap” ong u Bah Prestone haba pynpaw ia ka jingsngew skhem ba ki Pulit kin ioh ban kem ia ki briew tang ha kine ki khyndiat sngi ban wan.
Haba kylli, u Symbud Myntri Rangbah ula ong “Phim lah ban shu kynnoh ia ka Sorkar. Bun ki briew haba jia kano kano ka jingjia, ki shu kynnoh beit ia ka Sorkar”.
Ula ban jur ia ka jingkongsan ban phikir bha iala ki khun ki kti bad ban tip shano ki leit shano ki wan khnang ban khang lad ia kum kine ki jingjia. “Ha nga shimet nga sngew ba ngi donkam ban pynsngewthuh bha ia ki kmiekpa kiba donkam ban phikir bha iala ki khun”.
U Bah Prestone ula ban jur ba ka Sorkar kala kut jingmut ban shimkhia ia ki kam kiban pynthikna ia ka jingshngain bad jingiada ia ki nongshongshnong.
 Bah Prestone Tynsong ula iathuh ba ki Pulit kila thaw ia ka Special Investigation Team (SIT) ban tohkit ia ka jingshah pyniap u khynnah 7 snem ha Nongrah bad kular ia ka jingkem kloi ia ki nongleh bymman kiba donkti ha kane ka kam pyntriem ba shyrkhei.){kind=link}