Shillong, Naitung 18 : Ka Myntri ka Koit ka Khiah Kong Ampareen Lyngdoh hynne ka sngi Ba-ar, kala pyntip ba ka sorkar jylla kala thung iaka Committee kaban khmih bniah ia ki dawai dashin shwa ban bret noh ia ki.
Kane kadei hadien ka jingjia ba dang shen ha kaba ka Tnad ka Koit ka Khiah kala leit bret da ki lak tylli ki dawai sha Marten.
Ka Kong Ampareen Lyngdoh kala iathuh ia ki nongthoh khubor ba ka jingtohkit halor katei ka dang iaid shakhmat. “Nga dang ban ioh pdiang ia ka kaiphod halor katei ka jingtohkit,” kala ong.
“Hynrei ngi la thung pat ia ka committee kaban khmih bniah ia ki dawai dashin kiban bret noh khnang ban pynthikna ba kanjingbret ia ki dawai dashin kan long ha ka lynti kaba dei da ki tnad sorkar” kala bynrap.
Kala ong ba ym ju don kano kano ka committee ne ka bor sorkar kaban khmih ban pynthikna ia ki dawai dashin ki bym long shuh.
“Kam ju don kano kano ka jingtehlakam ia ka jingpynjaboh (Pollution Control) ban pynthikna ba kan don ka jingbud ryntih ia ki kyndon bad nangne shakhmat ngin phah bud ryntih ia ki kyndon jingbthah ha kaba iadei bad ka jingbret ia ki dawai dashin bad kitei ka long kaba donkam bha bad kum ka sorkar ngi donkam ban buh noh da ki kyndon” kala ong.
Ka Kong Ampareen kala ong ba la bthah iaka committee ba kadei ban bud ryntih ia ki kyndon jingbthah.
Ka tnad ka Koit ka Khiah, Municipal Board, Pollution Control Board, Drugs Controller Authority bad kiwei kiwei kin dei ki dkhot ha katei ka commitee.
Pule lang ia kane: Dep pynpra ki bor District haduh 13 tylli ki karkhana Coke be-ain ha West Khasi Hills
