Shillong Naitung 24: Ka Khasi Hills Autonomous District Council (KHADC) kala thung ia ka Kynhun Tohkit ban khmih bniah ia ki jingkynnoh die jaka hapoh ka khlaw Mawpat.
Ia kane ka Committee kaba don 3 ngut ki dkhot yn khlieh da u Joint Secretary u Bah J Dkhar, kaban kynthuplang ia u Deputy Secretary ka tnad Land A Syiem bad Under Secretary ka tnad Political Bah S Lamare.
Ia kane ka rai la shim da ka seng Voice of the People Party (VPP) kaba ialam ia ka Executive Committee (EC) ha ka jingialang kaba la long ha ka sngi Palei, shi sngi hadien ba ka kynhun kaba ialam da u Chief Executive Member (CEM) u Bah Shemborlang Rynjah kala pynlong ia ka jingjurip ia katei ka khlaw.
“Ka committee kan tohkit ia baroh ki jingkynnoh ha kaba iadei bad ka jingai jaka ia ki MLA bad ia ki kynhun bapher ha ka khlaw Mawpat” la ong u Executive Member (EM) Bah Powell Sohkhlet haba iakren bad ki nongpathai khubor hadien ba la wai ka jingialang.
“La bthah ia ka committee ba kan aiti ia ka kaiphod jingtohkit hapoh ka 3 bnai. Shisien ba la ioh pdiang ia ka kaiphod, ka Executive Committee kana sa shong ban iatai bad ban shim ia ka rai ha kaba iadei bad katei ka khlaw” ula ong.
U EM ula pyntip shuh shuh ba ka committee kam khmih ruh ia ka jingshim rai jong ka Executive Committee kaba rim ban pynduh pyndam noh ia ka Notification ne jingpynbna paidbah kaba la pynbna ia katei ka khlaw kum ka “Law Adong” ha u snem 2014.
Ula ong ba ka committee kan khmih ruh ia ka jingiatehkular kaba la iasoi hapdeng ka EC kaba ialam da u Bah Ardent Basaiawmoit bad u Syiem barim ka Hima Mylliem u Paiem Latho Manik Syiem bad ka jingktah ia ka khlaw.
Nalor kane ka committee kan tohkit ruh ha kaba iadei bad ka jingdon jongki jaka tep briew ha katei ka khlaw ban pynthikna la katei ka jaka kadei kaba la shu ai ei ne kadei kaba shu die.
Ia ka khlaw Mawpat la pynbna kum ka “Law Adong” ha u snem 2014, ia kane ka rai la pynkylla noh ha u snem 2019 bad ia ka tei ka khlaw la pynphai biang sha ka Hima Mylliem.
Haba kylli ia u Bah Sohkhlet la katei ka rai kaba la shim da u Bah Basaiawmoit bad u Syiem ka long ka sienjam kaba dei ban iada ia ka khlaw bad ia ka mariang.
“Ngi sngew ba katei ka rai lah dei ban bteng da ka EC kaba thymmai na ka bynta ban ia peit bad ia khmih lang ia ka khlaw ha Mawpat. Ha ka jingshisha, ia katei la leh katkum ki kyndon jong ka Sixth Schedule ka riti synshar ka ri ba ka district council kadei ban pynneh bad iaid ia ka mariang” ula bynrap.
 kala thung ia ka Kynhun Tohkit ban khmih bniah ia ki jingkynnoh die jaka hapoh ka Law Mawpat.){kind=link}