Shillong, Naiwieng 20 : Ka BCCI kala thung ia u President ka Meghalaya Cricket Association, Naba Bhattacharjee kum u Manager ka Indian Senior Women’s Cricket Team na ka bynta ka jingleit ialehkai ODI pyrshah ia ka Australia.
Ki jingialehkai jong ka ODI ba nyngkong bad ba-ar kan long ha Brisbane ha ka 4 tarik Nohprah bad 7 tarik Nohprah katba ka ODI b alai kan long ha ka 10 tarik Nohprah ha Perth. Kane ka series ka dei shibynta jong ka ICC Women’s Championship (2022-2025).
U Naba Bhattacharjee u dei u rangbah uba la pawkhmat bha ha ka jingpynroi ia ka kam ialehkai cricket ha Meghalaya la palat 15 snem. Ka jingtrei shitom jong u ka dei ka dawbah ba pynioh ia ka Jylla ban long ka dkhot ba pura jong ka BCCI ha u snem 2018.
Ha u snem 2016, ula shakri kum u dkhot ha ka BCCI NADP Committee bad ha u 2017, ula shah jied kumu dkhot ka Committee ki 7 ngut ki dkhot kynthup u Jay Shah, Rajeev Shukla bad Saurav Ganguly, kaba la bynshet ia ka kam ban shong bishar ia ki jingai jingmut jong ka Justice RM Lodha Committee.
Nalor kane, u dei ruh u dkhot jong ka kynhun BCCI kaba pynlong ia ki artylli ki jingialehkai cricket hapdeng ka India bad ka West Indies ha Florida ha u snem 2016 ban kyntiew ia ka jingialehkai cricket ha USA.
Ka kynhun ialehkai ka India kan mih na Mumbai ha ka 30 tarik Naiwieng ban leit sha Brisbane.
