Shillong, Naiwieng 22: Ka sorkar Assam hynne ka sngi kala pynbna ba la thung daka kynhun tohkit Judicial Inquiry ba khlieh da u nongbishar ba la shongthait haba iadei bad ka jingshah siat iap 6 ngut ki briew ha Mukroh West Jaintia Hills.
Ka sorkar Assam ruh kala pynbna ban ai jingiarap daka song pisa kaba T.5 lak sha baroh 6 ngut ki bahaïng jong kito kiba la khlad ha ka jingshah ther kuli ha ki Pulit Assam.
Nalor kane la pynbna ruh ba ka sorkar ka la pynkynriah kam ia u Imdad Ali u Superintendent of Police (SP) ka West Karbi bad la Sospon (Wengkam shipor) ia u Kajal Nath u Officer in Charge (OC) ka Jirikinding Police Station bad ia u Shikari Enghi u Forest Protection Officer ka Kheroni Forest Range kiba don lang haka jaka ba shah ther kuli ki paidbah ha Mukroh kaba la wanrah ruh ka jingkhlad noh 6 ngut ki riew paidbah.
Shuh shuh ka sorkar Assam kala pynbna ba ka sorkar ka kloi ban iatreilang bad baroh ki kynhun tohkit la kadei jong ka jylla ne jong ka sorkar pdeng ban wanrah ka jingtohkit kaba khuid bad naka liang ka sorkar Assam kala bthah ruh iaki Pulit bad iaki Forest Force kiba don ha kato ka jaka ba shah siat ki paidbah bad kidei ban don hajan la da donkam kano kano ka jingshah kylli halor ka jingjia.
