Shillong, Jylliew 27: Ka All India Trinamool Congress (AITC) kaba dang pyrshang ban suhthied ha Jylla, kala thung ia i Kong Meena Kharkongor kum i Chairperson ka Meghalaya Pradesh Trinamool Congress Legal Cell (MPTCLC).
I kong Meena Kharkongor iba la pyndep ia ka BA LLB na Shillong Law College, ila trei ha ki kyrdan bapher bapher kum i nongiasaid ain ha Jylla bad ila bat ruh ia ka kam Chairperson ka Meghalaya State Commission for Protection of Child Rights (SCPCR) hapdeng u snem 2014 haduh 2020, Dkhot ka Meghalaya State Women’s Commission (MSWC) hapdeng u snem 2012-2014 bad kiwei kiwei.
Kat kum ka shithi thungkam, u President ka Meghalaya Pradesh Trinamool Congress Bah Charles Pyngrope, MLA ka Nongthymmai ula pyntip ba ka party kala thung ia kong Meena ba in shimti noh ia ka kam kum i Chairperson ka Meghalaya Pradesh Trinamool Congress Legal Cell.
