Shillong, Nailar 22 : Ka Dorbar Shnong Patharlyndan da ka jingiatrei lang bad ka Iatreilang Edmund Rice Youth Action hynne ka sngi ka la pynlong da ka prokram thung dieng ha katei ka shnong da ka thong ba ki khun ki ksiew kiba hadien kin ioh lang ia ka mariang kaba khuid.
La wan ban donlang ruh ha kane ka sngi naduh u Lamphang ka Iing Dorbar Thawain ka jylla, Bah Metbah Lyngdoh, nangta u Deputy Commissioner ka Eastern West Khasi Hills, Additional Superintendent of Police ka District, Bah Esakeal Lyngdoh, Dongki-ingding nangta Br. Sunil Britto na Jyntru, Nongpoh, Fr. Michael Sun ba dei Parish Priest na Umkador, ki Vistitation Sister na Umkador, Bah Morwing Mawlong, Tymmen Basan Patharlydan bad bun kiwei kiwei.
Ka jingioh ban thung dieng ha katei ka jaka kadei da ka jingai sngewbha jong ka shnong ia ka jaka da ka jingiohi jngai ia ka jingkylla ki bor ka mariang.
U Bah Metbah haba kren kum u la pynpaw ia ka jingkmen ban iohi ia ki kum kitei ki prokram ba ki paidbah dalade ki sngewthuh haduh katno ka kordor ban pynneh pynsah ia ka mariang khamtam ia ki khun ki kti kiban ha ka pateng ba hadien. U la ai mynsiem ruh ba kum kane ka sienjam dei ban bteng biang wat ha ki snem ban wan bad ruh ban thung kham bun ki dieng.
La ioh ruh ia ka jingkren na u Deputy Commissioner, ASP kumjuh na u Br. Sunil Britto, Fr. Michael, Bah Alpheus Wahlang, na u Bah Onbor ba dei president ka seng samla nalor kiwei kiwei.
La donlang ruh ha ka sngi da ki khynnah skul na kylleng ki jaka kiba hap ha katei ka shnong.
Katei ka jaka ba la ai kyrpang ban thung dieng la tip kum u ‘Lum Laudato si’. Kane ka kyntien Laudato si kadei ka kyntien phira ba ai da u Kpa Bakhuid Pope Francsi uba la kren kumno ban iada ia la ka jong ka rympei.
Katei ka shnong, kadei kawei na ki jaka ba ki Christian Brothers ki sdang ia ka jingshakri jong ki naduh u snem 2018 da ka thong ban ai ia kaba bha tam na ka bynta ki nongshong shnong katei ka thaiñ da kaba sdang na ka pule puthi kumba ki la leh ha kiba bun ki shnong kum ha Mawjrong, East Khasi Hills, nangta ha Jyntru hajan Nongpoh. Umtyrkhang ba ha Umsohlait Parish, Wahrinong ha Kynshi.
