Thrang ka Sorkar ba pynkhie im ia ka MeECL | Trei borbah ka Tnad Bording ban tem ia ki jingduhnong

Shillong, Nailur 12 : U Myntri ka tnad bording Abu Taher Mondal u la pyntip ba ka Meghalaya Energy Corporation Limited (MeECL) kala pyrshang borbah mynta ban pynduna noh ia ki jingduhnong bad ban pynjanai bha noh ia ka jingtreikam.

Kane ka jingkren ka long halor ka kaiphod ba dang shen jong ka Comptroller and Auditor General of India (CAG), kaba la pynpaw ba hapoh u snem 2023-23, kumba 65% (T.371.17 klur) na ka jingduhnong baroh (572.28 klur tyngka) jong ki 14 tylli ki SPSE kiba treikam la noh synniang da ki ar tylli ki SPSE jong ka tnad bording – ka Meghalaya Power Generation Limited (MePGCL) bad ka Meghalaya Power Distribution Corporation Limited (MePDCL).

“Ngi dang pyrshang ban leh eiei halor kane. Kam dei ka kam kaba suk. Klet noh ïa ki bynta jong ka jingpynmih, jingsam bad jingpynpoi bording jong ngi namar wat ha kiwei pat ki jylla ruh ki mad ia kane ka juh ka jinglong. Ki don shibun ki mat kiba sngewkhia (kum ka jingduhnong jong ka A&TC, ki jingsiew ba dang sah jong ki nongpyndonkam bording bad kiwei kiwei),” ong u Mondal haba iakren bad ki nongthoh khubor.

“Ngi la pyrshang ban ïohi ba ka jingduhnong ka long kaba duna bad ka jingtreikam ka long kaba janai namar kane kan ïarap bha ïa ki nongpyndonkam bording jong ngi ruh. Kumta ngi dang pyrshang ban leh eiei ia ka. Ki jinglong jingman ki la kham biang mynta bad lada ngi leh eiei ia kane bad ngi iai bteng kumne, kiei kiei kin long kin sa iaid ha ka lynti kaba dei”, u la ong.

Haba kylli, u Myntri u la ong, “Ka thong jong u Myntri Rangbah ka jylla ka long ban iohi ba ia ka bording yn pynbiang sha ki nongpyndonkam bording khlem ki jingthut bad namar kata, donkam ia ka jingpyndap bording bad phi hap ban thied ia ka bording khamtam ha ki por ba duna slap bad ka sorkar Meghalaya kala iarap ha kane ka bynta bad ka pisa ruh ka long kaba heh bha”.

“Lada ka MePDCL kam donkam ia kane ka pisa, shu mutdur katno tylli ki surok, ki hospital, ki skul, ki kolej lah ban shna na kane ka pisa. Kata ka dei ka jingsngewkhia jong u Myntri Rangbah bad u la ïathuh ha ngi da ki kyntien kiba shai bha ba kino kino ki jingpynkylla kiba donkam ban leh ha ki lai tylli ki tnad, dei ban peit bniah bha bad ngi dang leh ia kane mynta,” u la ong haba bynrap “Kam long kaba suk. Kam dei ka kam ba tang shi miet ba ngin lah ban leh. Ki don shibun ki jingeh hangne, ki jingshim ram ki don, ki bynta jong ka ram ki don, ki jingsiew ki don – kine baroh ki ktah ïa ka rukom sam, wat ïa ka jingpynmih bad jingpynpoi bording ruh kumjuh.”

Haba pynpaw ïa ka jingkyrmen ban lah pynim biang ïa ka MeECL, u Mondal u la ong, “Nga don ka jingkyrmen bad dei na kata ka daw ba ngi dang pyrshang borbah ban leh eiei halor kane. Phi lah ban iohi ba ki don shibun ki jingkylla haba ianujor bad u snem ba la dep bad ki ar snem ba la dep ruh. Nga ai khublei ïa u Myntri Rangbah ka jylla namar khlem ka jingkyrshan bad jingïalam jong u, kan ym long kaba lah ban leh eiei namar ka tnad pla tyngka ka ai lut ïa ki jingdonkam kiba ngi la donkam.”

“Ka MeECL ruh ka treikam ha ka rukom kaba tbit bha bad haduh ka tarik ba nga shimti, nga la iohi, ba ki dang treikam borbah. Phi la ïohi ba ka eriong remal ka la pynjot jur ïa ka lain pynpoi bording jong ngi,hynrei ka MeECL kala trei sted bha ban pynbha biang ia ki lain bording watla ngi hap ban pynbun ia ki nongtrei” ula bynrap.

Haba pynpaw ba mynta u snem, ka MeECL kam shym la shim ia ka lynti ban pynlip bording (load shedding) wat tang shi minit, u Myntri u la ong, “Phi lah ban ujor balei ba mih ki jingthut/jingpynlip bording kaba bun. Kine ki dei namar ka jingkhang na ka bynta ki kam maramot ne ba don jingthut ha ki transformer bad kiwei kiwei. Kine kim dei ki jingpynlip bording kiba ju jia man ka por hynrei ki jingkhang kiba donkam na ka bynta ban maramot khamtam ha ka step sngi Saitjain, phin sa ïakynduh jingeh khyndiat namar ngi donkam ban khang.”

Haba kylli la ka MeECL ka don jingthmu ban pynduna noh ia ki nongtrei, u Mondal u la ong ba kam pat don satia kano kano ka rai kaba la shim halor kane ka bynta.