Shillong, Risaw 05 : Ka Ministry of New and Renewable Energy (MNRE), ka Sorkar India, kala prat lynti ban kyntiew noh ia ka kam pynmih bording na ki tyllong ki bym kut shirta (renewable energy) kata na ka bor jong ka sngi bad ka lyer ha ka thain Shatei Lam Mihngi ka Ri.
Kane ka jingshimkhia jong ka MNRE kala paw ha ka jingialang ba kala pynlong bad ki heh ki hain na ki Jylla bapher bapher ka Ri kaba la pyniaid da u Myntri kam pynmih bording ka Ri hynne ka sngi Palei ha Delhi. Ia ka Meghalaya la mihkhmat da ka kynhun ba ialam hi da u Myntri kam pynmih bording AT Mondal.
Haba kren ha ka jingialang, u Mondal ula batai halor ka jingiaid lynti jong ka Jylla haba phai sha ka jingpynmih bording na ki bor ka sngi bad ka lyer, ki jingeh ba ka Jylla ka iakynduh bad ki sienjam baka Sorkar Meghalaya kala shim ban kyntiew ia ka jingpynmih bording na ka sngi bad ka lyer lyngba ki sienjam bapher bapher ban lah pyndap bording ha Jylla.
Ula banjur ia ka jinglong kongsan ban pynthikna ia ka jingpahuh ka bording na ka bynta ki paid nongshongshnong ka Jylla Meghalaya bad ki Jylla ka thain Shatei Lam Mihngi.
U Mondal ula pyntip ruh ba ka Jylla kala pyntrei mynta ia ka Chief Minister Solar Mission (CM Solar Mission) kaba la pynwandur hi da u Myntri Rangbah ka Jylla, ban pynkhlain ia ka jingpynmih bording hapoh ka Jylla.
Kiwei pat ki jingai jingmut bala ai da ka Jylla ka long ban nang pynbun ia ka Central Financial Assistance ha ka Solar Roof Top Scheme, ban wad ia ka lad ka lynti ha kaban pyntreikam noh da ka Joint Venture ia ka Solar Park bad Pump Storage System.
U Mondal ula ban jur ruh ha kaban shong bishar thymmai ia ka jingkyrshan pisa ne subsidy bala ai sha ki SHP sha ka T. 7.5 klur shi MW na ka bynta ka project ba 1 haduh 25 MW jong ki SHP kaba la pynsangeh shipor hynrei la kular pat da u Myntri ba un sa khmih biang shen ia ka.
Ia u Mondal la synran da u Sanjay Goyal, Commissioner and Secretary ka tnad Bording bad u Dr Joram Beda, Director ka MNREDA bad Commissioner and Secretary ka Meghalaya.
U Joram Beda, Director, MNREDA ha ka jingialang, ula pynsngew ia ka jingsngewkhia halor ki jingeh bala mada da ka Jylla Meghalaya haba pyntreikam ia ka Pradhan Mantri Kisan Urja Suraksha evam Utthaan Mahabhiyan (PM KUSUM) program.
Ula ban jur ia ka jingdonkam ban kyrshan bad iatreilang bad ka Sorkar Pdeng ban lah weng ia kine ki jingeh bad ban nang pynsted ia ki kam ba iadei bad ka jingpynmih bording na ka sngi ha ka Jylla.
