Guwahati, Naiwieng 31: Ha kawei ka jingjia kaba sngewtriem, uwei u briew ula shah pyniap hadien ba uwei u hati khlaw ula thombor tyngeh ia ka kali kaba u shong katba u dang don ha ka lynti na Guwahati sha Tezpur ha kane ka miet sngi U Blei ba la lah.
Kane ka jingjia kala jia hajan ka shnong Roumari kaba hapoh Laharighat sub-division jong ka Morigaon district ka Assam ha ka lynti surok NH 37. Une u hati khlaw la ong ba ula shah pyniakhlad noh na ka kynhun ha ka por ba kila jam lyngba ia ka surok highway.
Katkum ki khubor la iathuh ba une u lanot ia uba la tip kyrteng kum u Debashish Bhattacharjee ula pynsangeh ia ka kali kaba u niah hadien ba ula iohi ia utei u hati ha kaba ula ap ba un jam lyngba sha shiliang jong ka surok.Hynrei, une u hati lehse ha ka jingsngewhut namar ka jingpynmeh ia ka headlight jong ka kali nalor ka jingsawa jong ka enjin kali ula tur beit beit sha katei ka kali bad pynjulor da kaba pyndonkam da u luta hashwa ba un sa thombor ia u Bhattacharjee uba niah ia kane ka kali.
U Bhattacharjee uba la ngat ha ka jingmynsaw kaba jur la pynkit noh ia u mardor shapoh hospital, hynrei na ka liang ki doktor kila pynbna ba ula dep khlad noh.
Na ka liang u DFO ka Nagaon u Bhaskar Deka ula ong, “Naduh kine ki khyndiat sngi ba la dep, ka kynhun jong ki hati kiba la wan napoh Sonaikuchi Reserve Forest kila wan poi sha kane ka jaka na ka bynta ban wad bam.Kane ka jingleit ka jong ki ka dei kaba ju jia khah khah ha kum kine ki aiom ot.”
Nalor kata ula ong ruh ba ki kynhun pahara ka tnat forest ki ju bishar bniah ha kaba iadei bad ka leit ka wan jong ki hati man la ka sngi.Barabor ula ong ba ki ju sakhi ia kane ka leit ka wan ka jong ki hapdeng ka por 6 baje janmiet haduh 7:30 mynmiet.Hynrei, ha katei ka sngi Saitjain ba la lah kine ki hati kila jam lyngba ia ka surok highway ha ka por 5:30 jan miet bad thombor ia katei ka kali ha kaba kum kane ka por.
Kham hashwa, ha ka 18 tarik u Nailur ba la dep, uwei u briw ula shah pyniap katba san ngut kiwei pat kila mynsaw jur hadien ba ka kynhun ki hati kila thombor ia ki ha ki bynta jong ka Baksa district ka Assam.Kane ka jingjia kala jia hapoh ka shnong Khairani jong ka district ha ka miet jong ka 18 tarik u Nailur ba la dep.
Ia une u lanot la tip kyrteng kum u Ravindra Boro.Katba ki san ngut kiwei pat kiba la ngat ha ki jingmynsaw ki kynthup ia u Dhanpati Boro, Anil Daimary, Paresh Boro, Thengona Musahari bad u Sulendra Boro.
Na ka liang ki nongshong shnong kila ong ba kane ka kynhun ki hati kila wanpoi na ka jaka khlaw ba marjan ban wad bam.Hynrei na ka liang ki nongshong shnong kila pyrshang ban pynher krad ia ki khnang ba kin leitphai shapoh khlaw pynban kine ki hati kila thombor ia ki.
