Shillong, Lber 21: U MP ka Shillong Bah Ricky AJ Syngkon ha ka sngi Palei, ula kyntu ia u Myntri ka Ministry of Road Transport and Highways Nitin Gadkari ban tuklar lem halor ka jingdonkam ban don ka Independent Quality Audit ia ka jingshna ia ka surok National Highway -6.
Ha ka shithi kaba la ai ha u Gadkari, u Bah Syngkon ula ong, “Nga kyntu ia ka ophis ka jong phi ban tuklar mardor bad ban shim ia ki sienjam kiba pyrkhing ban pynbeit ia ki jingdkoh. Ka long kaba donkam ban don ia ka Independent Quality Audit ia ka surok bah NH-6 ban khmih ba dei ban don ia ka jingkitkhlieh ha ka rukom treikam kaba paka bad ban pyrkhing ia ka rukom shna kat kum ka kyndon kaba dei ban leh, ban pynthikna ba kan ym don ka jingdkoh ha ki por ban wan.
Ula kynnoh, ba kala don ka jingiapein bad ka jingshna bha ia ka surok National Highway-6, ka lynti iaid kaba kongsan kba pyniasoh ia ka Meghalaya bad kiwei pat ki jylla, kaba plie lad ia ka kam khaii pateng bad ia ka kam jngohkai ha ka thain.
“Watla kane ka projek ka long kaba kongsan bha, hynrei ka rukom shna ia ka surok ka long ka bym lah ban pdiang, namar ka kam kala suki bad khamtam kaba sngewkhia bha, ka dei ka rukom trei kaba torti ia ka kam. Da kaba shimkhia ia kiba bun ki jingujor kiba la ioh pdiang ha kaba iadei bad ka jingbym trei bha ia ka kam, nga la aiti ha uwei u briew ban leit jurip bad ban pynshisha bad ban khmih ia ka jinglong jingman ia ka rukom trei ia ka kam” la ong u MP bad ka bynrap “Ka jingjurip ryngkat bad ka jingring video ia ka surokbah ha ka shnong Kuliang kala pyni shai kdar ba ia ka rong la lah ban khlong da ka kti, kaba pyni shai kdar ia ka jingbym don ia ka jingkitkhlieh bad ka jingtrei torti ia ka kam kontrak bad ka pynpaw ruh ia ka jingpyndonkam da ki mar kiba tad dor da u kontraktor. Kum katei ka rukom treikam ka ktah jur ia ka jingneh slem bad jingskhem jong ka surok, khamtam ha ka thain kaba don ia ki jaka kiba long riat bad kaba shah ktah na ka jinglong jong ka suinbneng”.
“Katei ka surokbah kaba dei kaba kongsan bha kadei ban don ia ka jinglong jingman kaba bha tam bad kaba don ia ka jingshngain, lada ka pulom, kumta kan sted bha ban jot ne sniew noh bad kan pynkiew ia ka jinglut ha ka bai maramot bad kan buh ha ka jingma ban mih ki jingjia aksiden bad ki jingmynsaw” ula pynpaw ha ka shithi.
