Shillong, Nohprah 28: Ka All Garo Hills Anganwadi Worker & Helpers Federation (AGHAWHF) kala kyntu ia u Myntri Rangbah ka jylla Conrad K Sangma ban tuklar lem halor ka jingslem ban kyntiew kam ia ki Senior Graduate Anganwadi Worker.
Ha ka shithi kaba la phah sha u Myntri Rangbah ka jylla, ka President ka AGHAWHF ka Monika D Sangma kala ong ba ka jingbym pyndep bad ka jingpynslem ban pyntreikam ia ka Memo jongka 2 tarik u Jylliew 2023, ha kaba iadei bad ka jingkyntiew kam ia ki Senior Graduate Anganwadi Worker, ka jingthung kontrak ia ki Lady Supervisor bad ka jingdawa ban ailad nyngkong ia ki Senior Graduate Anganwadi Worker kiba la trei lypa ia ka kam ban shah kyntiew kyrdan, kidei ki mat kiba la pynmih ia ka jingbym sngewhun hapdeng jongki nongtrei.
Kala ong ba ka Memo, kala buh ia ki kyndon ban kyntiew kyrdan Senior Graduate Anganwadi Worker, kadei kaba khlem shym la pyntreikam satia ka tkum ka por kaba la buh.
“Ka jingpynslem ban pyndep ia ki jingbthah jong ka Memo kala pynmih ia ka jingeh kaba khraw hapdeng ki nongtrei, kiba la trei shitom ha ka jingai jingshakri lyngba ka rukom treikam jong ka Anganwadi la bun phew snem.La pynmih ia ka memo da ka jingthmu ban ai mynsiem bad ban ithuh ia ka jingnoh synniang kaba kordor jong ki Senior Graduate Anganwadi Worker.Kine ki nongtrei kiba don ryngkat ia ka jingnang jingstad bad kiba la shakri bun snem, kila pyni ia ka jingaiti kaba kyrpang ha ki kam jongki. Hynrei, wat hapdeng ki jingbthah kaba shai kdar kaba la kdew ha ka memo, kam shym la don ka jingtreikam bha ban pynthikna ha ka ban kyntiew kyrdan ïa ki nongtrei kiba dei hok katkum ka por ba la buh” la ong ka Monika bad ka bynrap “Kane ka jingpynslem ym tang ba ka iuhroit ïa ka jingpyrshang jong ki nongtrei hynrei ka pynmih ruh ka jingsngew bynniaw bad ka pynduh jingkyrmen ia ki. Ka long kaba kongsan, ba ka sorkar jylla kan pynthikna ba ïa ki kyndon ba la kdew ha ka memo yn pyntreikam khlem da pynslem shuh.”
Ha kaba iadei bad ka jingthung da ka kontrak ia ki Lady Supervisor, ka President kala ong, ba ka jingbym don ki kyndon kiba shai kdar ban thung ia ki Lady Supervisor kala wanrah ia ka jingsngew ka bym hok ia ki nongtrei Anganwadi kiba la don lypa.
Ka Monika kala ong shuh shuh, ha ka shithi ba ka All Garo Hills Anganwadi Worker & Helpers Federation ka kyntu ïa ka sorkar ba kan buh hakhmat eh ïa ki Senior Graduate Anganwadi Workers kiba la don lypa ha ka kam na ka bynta ban kyntiew kyrdan bad ban thung ïa ki ha ka kam Supervisor.
“Kine ki nongtrei kila aiti lut ïa la ka jong ka jingim ha kaba iadei bad ka rukom treikam jong ka Anganwadi bad kila ïoh ïa ka jingshemphang kaba bun ha kine ki snem kiba la leit.
Kila don ïa ki jingtbit bad ia ki sap ki phong kiba kongsan ban shim ïa ki kam kiba kham heh kiba don ia ka jingkitkhlieh bad kumta dei ban ailad shwa ia ki ha kano kano ka jingpynrung kam ne jingkyntiew kyrdan ha ka kam”.
 kala kyntu ia u Myntri Rangbah ka jylla Conrad K Sangma ban tuklar lem halor ka jingslem ban kyntiew kam ia ki Senior Graduate Anganwadi Worker.){kind=link}