Shillong, Nailur 10 : U Symbud Myntri Rangbah ba khmih ia ka tnad Transport Bah Sniawbhalang Dhar ha ka sngi Ba-ar ula pyntip ba ka tnad kala kyrpad ia ka tnad PWD ban pynkloi noh ha kaban shna ia ka surok na kawei ka lynti (alternative road) khnang ba ki bos ba heh, kin lah ban pyndonkam ia ka Inter-State Bus Terminus(ISBT) ha Mawlai Mawiong.
Haba iakren bad ki nongthoh khubor, u Bah Sniawbha ula ong “ Ngi la pyrshang ban kyrpad ia ka PWD ba kan pyndep noh ia ka surok na kawei ka lynti bad ngi kyrmen ba ynda dep kane ka surok, ki bos ba heh ki lah ban wan bad sdang biang ia ka kamai na ISBT”.
U pyntip ba ka jingkhang ban iaid ia ki kali heh na jingkieng Umiam, kala ktah bha ia ki nongpyniaid bos bad kumjuh ruh ia ki trai dukan kiba shong dukan ha ISBT.
“Hynrei, ngi khmih lynti ba ka surok na Mawlai bypass sha Kad Liengsuin-yn lah ban pyndep noh hapoh ka shisnem bad ngi khmih lynti ba ki kam ki jam kin sa iaid noh shaid shaid” ula ong.
Halor ka jingkynnoh ba pyndonkam bakla ki runar ia ka ISBT, u Symbud Myntri Rangbah ula ong “ Nga la iohsngew ia kane ka khubor hynrei ngam pat ioh pdiang ia kano kano ka jingujor hynrei nga la bthah ia ki Ophisar jong nga ba kin leit khmih bad ban peit ia kane ka kam. Ki Ophisar kila leit ban jurip ha kine ki sngi bala leit nh bad kin sa aiti ia ka kaiphod ha kine ki sngi ban wan. Ngin sa leh eiei halor kane namar ngim dei ban ailad ia ki riew runar ba kin sah hangtei”.
