Shillong, Nailar 07 : Ka Khasi Students Union (KSU) kala thoh ia ka shithi sha ka North Eastern Hill University (NEHU) ba kan ai jaka kyrpang ia ki samla pule ka Jylla kiba wan phet na ki jaka pule bapher bapher ka Jylla Manipur, ba kin ioh bteng biang ia ki jingpule jong ki.
Ka KSU lyngba u Chairman ka Education Cell samla Pynkmenlang Sanmiet bad u Secretary samla Shellkitbok Kharbani, kila phah ia kane ka shithi hynne ka sngi Nyngkong, sha u Vice Chancellor ka NEHU Prof Prabha Shankar Shukla.
Kat kum kane ka shithi, ka KSU kala pyntip ia ki jingeh kaba iakynduh da ki samla pule na ka Jylla Meghalaya, kiba pule ha Manipur University namar ka jingbym shongsuk ha ka Jylla Manipur kat haduh kine ki sngi.
“Ki samla pule na ka Jylla jong ngi ki don ha ka khim khait, ka jingbym shongsuk kala pynshongsyier ia ki samla pule jong ngi bad ka dak ka shin ba kin leit phai biang sha kane ka jylla (Manipur) kam idon jingkyrmen shuh namar ka jingsyier kaba la rung ha ka jingmut jingpyrkhat jong ki bad ka lawei jong ki ruh kami poi shano shano ruh namar ka jingbym thikna ba haduh lano kane ka jingiaumsnam kan kut bad wanphai biang ka suk ka sain ha Manipur” kala ong.
Namar kane, ka KSU kala kyrpad ba ka NEHU kan ai jaka kyrpang lem hapoh ka skulbah bad ban pynthikna ha kaban ai ia baroh ki lad jingiarap sha kine ki samla pule ka Jylla kiba la shah ktah na kane ka jinglong jingman ha Manipur khnang ba kin nym shu duh ei ia ki semester jong ki ha kaba ka University ka lah ban sdang ai ia ki jinghikai naduh ka lynnong ba ki duh lane ban ai pynrung klas kyrpang ia ki kat kum ka jingsngewbit jong ka University.
Pule ruh: Thombor ki runar ia ka kompani ba shna surok Nongstoin-Wahkaji, shah thang kawei ka dumper
 kala thoh ia ka shithi sha ka North Eastern Hill University (NEHU) ba kan ai jaka kyrpang ia ki samla pule ka Jylla kiba wan phet na ki jaka pule bapher bapher ka Jylla Manipur, ba kin ioh bteng biang ia ki jingpule jong ki.){kind=link}