Shillong, K’Lyngkot 12: Ka Hynniewtrep National Youth Movement (HNYM) hynne ka sngi palei, ka la hiar ban leit khang tala ia ka khyrdop jong ka Khasi Hills Autonomous District Council (KHADC) halor ka jingslem jong ka council ban weng ia u Acting Syiem ka Hima Mylliem u Ainam Manik Syiem.
Hashuwa ba ki dkhot ka seng HNYM kin poi sha District Council, naka liang ka council ka la pynjur ia ki bor pahara bad la khang ban rung ban mih ki kali na kane ka khyrdop namar ba ki dkhot jong ka HNYM ki la pyni bor.
Haba iadei bad kane ka jingwantur ki dkhot ka seng HNYM, u Deputy Secretary ka KHADC ula wan ban iakren bad u nongialam ka HNYM u bah Louis Dohtdong.
Haba kren sha ki lad pathai khubor u President ka HNYM bah Louis Dohtdong ula ong ba lyngba u Deputy Secretary ka KHADC u la phah ia ka khubor sha u CEM ba ka seng kan ai por haduh ka 19 tarik mynta u bnai weng ia u Acting Syiem ka Hima Mylliem u Ainam Manik Syiem.
U bah Loius ula iathuh ruh ba ka seng ka la byrngem ruh ba lada u CEM um lah ban leh ha ka por ba ki la buh, ki la byrngem ba ha kano kano ka por kin wan ban pyni bor bad kin wan ban kawang maw.
“Lada u CEM um lah ban leh hapoh ka 19 tarik, ngin wan biang ha ka por bym tip bad lada don ki bor pahara ruh ngin kiew na ki kynroh bad ki lah ban riew da u maw” la ong u bah Loius.
U bah Loius ula iathuh ba ka seng la arsien ka la don jingialang bad u Acting Syiem bad u Syiem ka Raid Marwet, ban dawa ban weng noh ia ki Garo na ka jinglong Rangbah shnong bad ban pyndam noh ia ka kyntien ha ka Mylliem Act ba la thoh ‘Nongpyniaid shnong’ hynrei haduh mynta namar ka jingkyrshan jong u bah Titoss u Acting Syiem u dang shong syaid ha ophis jong ka Hima Mylliem.
